ამბობენ - სიტყვა აზრის პატარა გემია, რომელსაც აზრი მოაქვსო

ბავშვში თავიდანვე ჩათესილია უფლის სიმდიდრე. წარმოიდგინეთ თასი, რომელშიც უფალმა ჩააწყო თავისი ყველა კარგი თვისება. ამ თასს სჭირდება მორწყვა, სწორი მორწყვის წესებით. რასაც აკეთებს კარგი აღმზრდელი

განათლებული ის არის, ვისშიც ღვთის თვისებებმა გაიღვიძა, ვისშიც უფლის თვისებები აღმოცენდა

ჭეშმარიტი აღზრდა საკუთარი თავის აღზრდით იწყება. გინდა, შვილი აღზარდო? - აღზარდე საკუთარი თავი შვილთან ერთად

ძალიან ძნელი ყოფილა, სრულყოფილი ადამიანი გახდე. მაგრამ რომ არ გახდე - ცოდვაა

სიძნელე იმისთვის არსებობს, რომ ადამიანად იქცე. თუ ყველაფერი ადვილი იქნება, ადამიანი ვერ გახდები

არის ორი სიტყვა, ერთმანეთზე უკეთესი - აღზრდა და თვითაღზრდა. აღზრდა - როცა ჩვენ ვზრდით ბავშვს. თვითაღზრდა - როდესაც საკუთარ თავს ვზრდით

რა აზრი აქვს შვილის აღზრდას, თუ უკეთესი არ გახდა მშობელზე? შვილი რაღაცით წინ უნდა წავიდეს მშობელზე. შეიძლება ყველაფრით ვერა, მაგრამ, ან გონიერებით, ან განათლებით, კულტურით, თავისებური უნარებით,.. რაღაცით თუ არ დაწინაურდა შვილი ჩვენზე, მაშასადამე, ჩვენ დავაკელით აღზრდა, იმიტომ, რომ ყველა ბავშვში არის ჩადებული ძალა, რომლითაც შეუძლია ჩვენ გაგვისწროს

თუ ვინმემ შენთან შესცოდა, მიუტევე. მიუტევე ღიმილით, კეთილად, არ ჩაირჩინო გულში. აი ეს არის თვითაღზრდა!

სიკეთე სიკეთით აღიზრდება; სიყვარული სიყვარულით აღიზრდება; თავმდაბლობა - თავმდაბლობით; კულტურა - კულტურით; სილამაზე - სილამაზით; ბოროტება ვერ ზრდის სიკეთეს. ეს კანონი არ არსებობს. სიკეთეს კი შეუძლია ბოროტება დაადნოს, იქიდან ის ამოიღოს, რაც სიკეთეს გამოადგება და დანარჩენი ნაგავს გაატანოს

ბოროტება ვერ ზრდის სიკეთეს, სიკეთეს კი შეუძლია ბოროტება დაადნოს

ბოროტებაში სიკეთე არ დაიბადება. სიძულვილში სიყვარული არ დაიბადება

თითოეული მშობელი მომავალი წლების მხატვარია. ჩვენი შედევრები გამოიფინება 10-15-20-30 წლის შემდგომ

ადამიანის შესაძლებლობას ზღვარი არა აქვს. სადაც კომპიუტერი იპოვა, იქ იმაზე მეტს იპოვის და მერე კიდე მეტს იპოვის და ეს არ დასრულდება არასდროს

სადაც სუსტი მხარეები გაქვთ, გაიძლიერეთ. სადაც ცუდი ჩვევა გაქვთ, მოიცილეთ. და სადაც ძლიერი გაქვთ, კიდევ უფრო გაიძლიერეთ. და ბავშვი მიიღებს იმ დედას და იმ მამას, რომელიც სჭირდება. აი ეს არის აღზრდის პირველი კანონი - ჭეშმარიტი აღზრდა საკუთარი თავის აღზრდით იწყება

აღზრდაში არ შეიძლება რომელიმე დღე გამოტოვო. ხვალ აღვზრდიო - არ არსებობს. ან დღეს, ან არასოდეს

ხვალინდელი დღეო - ქრისტე ამბობს - თვითონ მოიტანს ხვალინდელ საქმეებს, დღევანდელი გააკეთეო

გადადებული საქმე არ ნიშნავს, რომ დასრულდება. გააჩნია საქმეს, აღზრდაში გადადებული საქმე არ სრულდება, რჩება ნაკლოვანი

მე უნდა ვეცადო სრულყოფას. რა თქმა უნდა, ბოლომდე სრულყოფილი ვერ გავხდები, მაგრამ გავუსწრებ ჩემ თავს, შვილმა რომ ჩემგან უკეთესი რამ დაინახოს

გუშინ ერთი მშობელი მეუბნებოდა - ახლა გავიგე აღზრდა რა ყოფილაო. მე ჩემი თავი შვილთან ერთად უნდა ვზარდოო - ეს მართალია. შვილთან ერთად გავიზარდოთ. როცა შვილთან ერთად იზრდები, ის წინ წავა. მაგრამ თუ გგონია, რომ შენ უკვე გაზრდილი ხარ - აი აქ ვდგავარ და ჩემ შვილს ჩემზე წინ არ გავუშვებო - შვილი მართლა ვერ წავა წინ. მოგემსგავსება შენ, უკეთეს შემთხვევაში

კეთილშობილება კეთილშობილებით აღიზრდება

დიდსულოვანი ადამიანი არის დინჯი, ბრძენი, გამგები, დამთმობი,... დიდსულოვანმა იცის - დამდაბლდი, რათა ამაღლდეო - და არ მოგაჩვენებს თავს შენზე მეტად. ასევე, დიდსულოვანი ადამიანი არ არსებობს რწმენის გარეშე

როგორც თქვენ დაეჩვიეთ სიგარეტის წევას, ისე დაეჩვევა თქვენი შვილიც. იცით, რატომ არ უნდა ეწეოდეთ? ერთ ღერ სიგარეტს თქვენი ცხოვრებიდან 12 წუთი და 15 წამი მიაქვს თან.

ვინც სიგარეტსაა მიჩვეული, ან სმას, დროსტარებას,.. ასეთ ადამიანს თავში ასეთი აზრები უტრიალებს: დრო სად გავატარო, სიგარეტი სად ვიყიდო, შენ ხომ არ გაქვს სიგარეტი? მომაწევინე რაა, ცეცხლი გაქვს? მოუკიდე... რად მინდა მე ასეთი ცნობიერება და ეს აზრები, მაშინ, როცა უფრო მეტი სასიკეთო, სააზროვნო საქმე მაქვს? და ამაზე რომ დრო დავხარჯე? ამას ჰქვია ფსიქიკური ენერგიის ფლანგვა

ჩვენ აქედან რაღაც დიდი გვაქვს წასაღები თან. ამისთვის, ჩვენ უნდა მოვიცილოთ ის საზრუნავები, რაც ჩვენ ცხოვრებას ახურდავებს. ხშირად ჩვენ ცხოვრებას ვახურდავებთ უაზრო სანახაობებზე, გართობებზე, დროსტარებაზე...

დედებო, თქვენ შვილებში თესლია პიროვნებისა. თქვენზეა დამოკიდებული, თქვენს ნიჭზე, ზრუნვაზე, აღზრდის ხასიათზე, რომ მათში მართლაც დაიბადოს ნებისყოფიანი, ცხოვრების აზრის მცოდნე პიროვნება, და გამარჯვებული დედები იქნებით

გაზარდე შენი შვილი, როგორც ღვთისმშობელს ეკადრება რომ გაზარდო

ჩვენ სხვა აღმზრდელებიც გვყავს ჩვენი ბავშვებისა, ესენი ანგელოზები არიან, რომლებიც სულ თან დასდევენ და იცავენ მათ. თუ ჩვენ შვილს ვასწავლეთ - რომ ზეცა ცოცხალია, იქ ანგელოზები გყავს შენ, რომლებიც გივლიან, გიცავენ შენ, აბა ერთი უსმინე მათ, გული გიგრძნობს! - თუ ბავშვს ეს ჩავუდეთ გულში, რომ ეს ასე ხდება, მართლაც, ის ხშირად მოისმენს მათგან რაღაცას

თუ შენ ამჟამად გგონია, რომ ბავშვები არ იმსახურებენ ამდენ ყურადღებას, მაშინ შეხედე არა იმას, როგორები არიან ისინი ახლა, არამედ იმას, თუ როგორები უნდა გახდნენ ისინი ღმერთის განზრახვით

ბავშვები თქვენი გამზრდელებიც არიან. ბავშვებს ჩვენ კი არ ვზრდით მარტო, ისინიც გვზრდიან და გამოცდებს გვიწყობენ: მოთმინებაში, სიმშვიდეში...

ბავშვები შენი საუკეთესო მასწავლებელ-აღმზრდელები არიან. უნდა გაუხდე ბავშვს მოწაფედ. როცა ბავშვი პატარაა, ტირილითაც გასწავლის, თავისი ჯიუტობითაც გასწავლის, სიყვარულს, მოთმინებას გასწავლის,.. თუ ისწავლი, შენც გაიზრდები ბავშვთან ერთად

როგორი წარმოდგენა უნდა გვქონდეს ბავშვზე? - დიდი! ის პატარაა, მაგრამ მასში დიდი ძალებია. ღვთიური ძალებია ბავშვში. პიროვნული თესლი უკვე ჩათესილია მასში. ღმერთმა ჩათესა. ჩვენ მარტო წყალი უნდა დავუსხათ, რომ ეს თესლი გაღვივდეს

რაც უფრო შემოქმედებითი ცხოვრება გვაქვს, მით უფრო ცხოვრება სწრაფად მიდის. რაც უფრო არ მოგვწონს, არ გვიხარია და უსაქმურობაში ვართ, მით უფრო დრო იჭიმება და გვემატება წუხილი და ტანჯვა

მე შემიძლია ვილოცო იქ, სადაც ვარ. სულ საყდარში ვარ, თუ მწამს. და თუ არა მწამს, გინდა ვიარო ეკლესიაში, გინდა არ ვიარო, ათასი სანთელიც რომ დავანთო, ერთი სანთლის ფასი არ ექნება ამას

ბედნიერების საწყისი ის არის, რომ მე სხვას ვხდი ბედნიერს. გინდა ბედნიერი შვილი? შენმა შვილმა უნდა გააბედნიეროს ცოლიც, შვილებიც, მეზობლებიც და საერთოდ ყველა, ვისაც კი ხვდება

პატრიოტი სიცოცხლის გამწირველია. თუ დასჭირდება, უნდა თავიც დადო. აბა, სხვა რას დავარქვათ პატრიოტი?

დაიხსომეთ ეს ორი მცნება: ბავშვები გავზარდოთ კეთილშობილი და თუ შეგვიძლია, დიდსულოვანიც. დიდსულოვანი მორწმუნე არის, წყნარად მორწმუნე, მომთმენი არის ბევრი რამის, ბევრი გაჭირვების. დიდსულოვანს თავისი თავი ავიწყდება სხვების გულისთვის

თუ ერთი მეზობელი გიყვარს და მეორე არა, მაშინ კეთილშობილი არა ხარ. თუ მშობლები დაივიწყე, რა კეთილშობილებაზე შეიძლება იყოს ლაპარაკი?

თუ ჩვენ გვინდა, რომ ჩვენი ბავშვები კეთილშობილები გამოვიდნენ, დაიხსომეთ აღზრდის ყველაზე მთავარი წესი - ბავშვების აღზრდა საკუთარი თავის აღზრდით იწყება

გინდა კეთილშობილი გაზარდო შვილი? - კეთილშობილი იყავი შენ. შენც დამშვენდები და შვილიც დამშვენდება. დიდსულოვანი გინდა? - შენ თავად იყავი დიდსულოვანი. დიდსულოვანი რომ გაზარდო შვილი, შენ თავად მოძებნე დიდსულოვნება საკუთარ თავში

რაც მეტს ღიზიანდები, მით მეტად გეცვლება ფიზიოლოგიურად სხეული, მით მეტი მომწამვლელი ნივთიერება ჩნდება სხეულში, რომელიც შეიძლება კიბოს, ან სხვა რომელიმე დაავადების წინაპირობა გახდეს. გაბრაზებული ადამიანები ძალიან ხშირად ავად ხდებიან

ბედნიერება არის შინაგანი მდგომარეობა. ბედნიერება არ ნიშნავს, რომ მე სულ ცეკვა-თამაშში და სიმღერებში ვარ. შეიძლება რაღაცაში ჩაფიქრებული ვიყო, ქვეყნის ბედი მაწუხებდეს, მაგრამ ბედნიერი ვიყო მაინც. ბედნიერი იმით, რომ რაღაცას ვემსახურები

ბედნიერება, ბედი და უბედურება ერთმანეთზე გადაჯაჭვულია და ძალიან მნიჭშვნელოვანია ამაში გავერკვეთ, იმიტომ, რომ როცა გავერკვევით, გვეცოდინება, საით ვიაროთ, და თუ ვერ გავერკვევით, ბედნიერებას დავუწყებთ ძიებას იქ, სადაც ის არ არის

ერთმა ფილოსოფოსმა თქვა: "ბედი ყველგან არის, და ის არსადაც არ არის". სადაც არ უნდა ეძებო ბედი, ვერ იპოვი, გარეთ ბედი არ არსებობს. ჩემშია ბედი, მე ვარ შიგნით ბედნიერი. მე როგორ მიგიღებთ თქვენ, ამის მიხედვით, ან ბედნიერი ვიქნები, ან უბედური. მნიშვნელობა არა აქვს გარეთ რა ხდება, მე შიგნით უნდა ვიგრძნო ბედნიერების განცდა

სიყვარული სიყვარულით აღიზრდება. სიყვარული არ აღიზრდება სიძულვილით. ქართველ ხალხს უთქვამს - "შვილი მტრად გაზარდე, მოყვრად გამოგადგებაო" - არ გამოგადგება მოყვრად, მტრად გაზრდილი შვილი. მტრად გაზრდილი მტერი გაგიხდება, მოყვრად გაზრდილი - მოყვრად გაგიხდება

აი როგორ მიიღებ ცხოვრებას, იმის მიხედვით განისაზღვრება როგორი ადამიანი ხარ, ბედნიერი თუ რაღაცა დაკარგე

კარგიც მოხდება, ცუდიც მოხდება, უნდა ყველაფერი მივიღოთ. თუ მივიღებთ, აი აქ იწყება ჩვენი ბედნიერება. რაც ჩვენს ირგვლივ ხდება, არ დავარქვათ არაფერს კარგი და ცუდი. რაც მოხდა, ამას ვეღარაფერს ვეღარ ვუშველით. კარგი მოხდა? გავიხაროთ. ცუდი მოხდა? დასკვნა გავაკეთოთ, - რატომ მოხდა ეს? და აი ამაში დავინახავთ ამ თითქოსდა ცუდი რაღაცის სიკეთეს

მე მინდა, რომ თქვენ შეგიწყოთ ხელი. მე შეიძლება მაკლდეს რაღაც, მაგრამ გამოვიქცევი, რომ თქვენ შეგიწყოთ ხელი. ვიღაცას მოვეფერები, ვიღაცას გავუღიმებ, ვიღაცას გულში ვუსურვებ კარგს. ცხოვრებაში ვარ აი ასეთი კაცი. თქვენი აზრით, უბედური ვარ თუ ბედნიერი?

სიკეთე თუ გააკეთე, იქვე დაივიწყე, ვის რა გაუკეთე. თუ დაიხსომებ, მაშინ უნდა გაუხსენო, არა? და თუ გაუხსენებ, ღმერთი ჩამოგაწერს მაგ სიკეთეს და პირიქით, ცოდვაში ჩაგითვლის. მაგრამ, თუ ვინმემ გაგიკეთა სიკეთე, აი ეგ არ უნდა დაივიწყო. უნდა გადაუხადო. მას თუ არა, სხვას მაინც

ვის გადავუხადოთ ჩვენი მშობლების ზრუნვა ჩვენზე? დედას როგორ გადავუხდით? ნათქვამია, - ხელის გულზე ერბოკვერცხი რომ შეუწვა, დედის ამაგს ვერ გადაიხდიო. მაგრამ, შემიძლია გადავუხადო, - შვილს გავზრდი მე. მან ხომ მე გამზარდა, ახლა მე შვილს გავზრდი, სხვას დავეხმარები შვილის აღზრდაში, მის შვილს ხელში დავიჭერ, შვებას მივცემ, სიტყვას შევაშველებ,..

როცა მე გემსახურებით თქვენ, ნაცნობს, უცნობს, ამაში ვხედავ ჩემი კმაყოფილების რაღაც წყაროს. ბედნიერება კმაყოფილებაა. ამრიგად, მე შემიძლია ვიყო მუდმივად ბედნიერი

ქართველ კაცს აქვს ნათქვამი - სახლი რომ გეწვოდეს, ხელი მოითბეო. იწვის უკვე და ამით მაინც ისარგებლე

შეიძლება ბედი იპოვო იქ, სადაც უბედობაა. ბედისწერა მოგადგა? - იმაში იპოვი ბედს

ბედისწერაშიც კი შეიძლება ბედნიერება იპოვო. როგორ მიიღებ ამას, რა სულით მიიღებ, იმის მიხედვით ან ბედნიერი იქნები, ან - უბედური

ყველაფერში, რასაც ცუდ მოვლენად აფასებ, არის რაღაც კარგიც. ნათქვამია - არავინაა შენი მტერი, არავინაა შენი მეგობარი, ყველა შენი მასწავლებელია. ყველა ადამიანი და ამავე დროს ყველა მოვლენა შენი მასწავლებელია

რაღაცა დაკარგე? - ჭკუით ამაღლდი, მომავლისთვის გაფრთხილდი, აღარ დაკარგავ. მაგრამ ვინც ის იპოვა, სიკეთე შეუთვალე მას, ალბათ სჭირდებოდა და იპოვა. იტყვიან ხოლმე - როცა რამეს დაკარგავ, თქვი, ალბათ დრო დადგა, ახალი შევიძინო

აუცილებლად, სიკეთეს მოსდევს შენთვის კიდევ უფრო დიდი სიკეთე. გაეცი, რომ მიიღო. "მიიღე, რომ გასცე" კი არა, ჯერ გაეცი. ღებულობს ის, ვინც გასცემს

ოჯახი რომ იშლება, ეს ნანგრევებია, რომლის ქვეშაც ბავშვი უნდა მოჰყვეს. როცა სახლი ფიზიკურად ინგრევა, ეს ტკივილი უფრო ნაკლებია, ვიდრე ის ტკივილი, რასაც ბავშვი მშობლების კონფლიქტის დროს განიცდის

გაჭირვებაში გაზრდილი ბავშვი ხანდახან გენიოსი ხდება, ხოლო ფუფუნებაში და სიმდიდრეში გაზრდილი ბავშვი იჩაგრება მერე ცხოვრებაში

არ შეგშურდეს! შური თუ არ ჩამოიცილე ბედნიერი ვერ იქნები. წყენა თუ არ ჩამოიცილე, ბედნიერი ვერ იქნები. თუ მიტევება არ იცი, ბედნიერი ვერ იქნები. თუ მტრობა გაქვს ვინმეს მიმართ, რა ბედს უნდა ეწიო? ვერ იქნები ბედნიერი

აზრები გვტანჯავს ჩვენ! ცუდი ფიქრები შემოგიჩნდება და იტანჯები. ხანდახან ისეთ რამეს წარმოიდგენ, აზრები რომ დაფარული არ იყოს, ალბათ სირცხვილით დაიწვებოდი. გავასუფთაოთ აზრები და ბედნიერი ვიქნებით. თუ არა გწყინს, თუ არ ბრაზდები, თუ არ ყვირი, თუ არ გშურს, ამის შესაბამისი განწყობები გამოიგავა უკვე ჩვენი ცნობიერებიდან, რომლებიც კარგ აზრებს არ დაბადებდნენ. ამრიგად, ბედნიერება ხელში მიჭირავს. შემიძლია ვიყო ბედნიერი

თუ გიყვარს ცხოვრება, მაშ რისკიც უნდა გქონდეს. ვინც რისკიანი არაა, ვერ იტყვის, რომ პიროვნება ვარო, იმიტომ, რომ ნებისყოფა არ ჰქონია. მშიშარას რა პიროვნება უნდა დაარქვა? მშიშრები ვართ? რაღაცის გვეშინია? მაშასადამე, პიროვნულობის ერთ-ერთი მთავარი თვისება - სიმამაცე, გამბედაობა - არა გვაქვს და უნდა შევიძინოთ, თუ გვინდა პიროვნება გავხდეთ

ხელის გულზე ატარე შენი ცოლი. ნახე როგორ გაგეფურჩქნება, უფრო გალამაზდება, უფრო განაზდება,.. შენც გაახალგაზრდავდები

ქალებო, არ გჭირდებათ სახლში თქვენ ხელში აიღოთ ქმრის მართვა. მას თავისი გაქანება აქვს, მიეცი, თავისი დაამკვიდროს. კაცი შექმნილია შექმნისათვის, რაც უფრო მეტად ლაგამს ამოსდებ, მით უფრო მეტად ოჯახს დააჩიავებ

ჰუმანურობა ის კი არ არის - "წადი და აკეთე რაც გინდა", "თავში ქვა გიხლია",.. ეს არ არის ჰუმანურობა. ჰუმანურობა არის ურთიერთპატივისცემა, გაგება, უფროს-უმცროსობა, დათმობა, მიღება და რა თქმა უნდა - რწმენა. აი ეს არის მთელი ჰუმანიზმის აზრი. ეს ასწავლე შენ შვილებს ასწავლე ეს შენ შვილებს

არ გიყვარს? - შეიყვარე! ვიღაცა იტყვის - "სიყვარული ან არის, ან არ არის" - ვითომ დიდ ფილოსოფიას ამბობს. რას ქვია არ არის? სიყვარული სულ არის, როგორც მოუვლი, ისეთი გახდება

სიყვარული იზრდება პატივისცემით, ერთგულებით, თავაზიანობით, დათმობით,.. გააკეთე ესენი და ეს სიყვარული უფრო მეტად გაღრმავდება, გაღრმავდება და ასაკში უფრო და უფრო მეტად დატკბება

როგორც ბავშვებში გვინდა კეთილშობილება აღვზარდოთ, ისე ჩვენში აღვზარდოთ სიყვარული

მეგობრობაში: ჯაჯღანი არ შეიძლება, ყვირილი არ შეიძლება, ჩხუბი არ შეიძლება, დამცირება არ შეიძლება,.. არავინ არ იმეგობრებს იმასთან, ვინც მას ამცირებს, გამორიცხულია!

ყველაზე მთავარი აღზრდის გზა არის ბავშვთან მეგობრობა. ბავშვთან იმეგობრე. როგორც დიდმა პატარასთან კი არა, არამედ, როგორც თანასწორმა. ყველა კანონი, რაც მეგობრობაში მოქმედებს, ბავშვთან ურთიერთობაში უნდა შეიტანო. მეგობრობაში არავინ მეტი და არავინ ნაკლები არ არის. ყველა ერთისთვის და ერთი ყველასთვის არის. დათმობა ვიცით, დახმარებაც ვიცით და თავგანწირვაც ვიცით. თუ ერთმანეთს საყვედურები და კრიტიკა დავუწყეთ, გავექცევით ერთმანეთს

როგორც მე მამაჩემის ფრონტიდან გამოგზავნილი წერილები დღემდე მზრდის, ასე გაზრდის თქვენ შვილებსაც თქვენი წერილები. დაუწერეთ გულახდილი, კეთილი წერილები. შენი თავი დაანახე, გული გაუხსენი. ჩაახედე შიგნით, რა გაწუხებს, რა გილხინს და ნელნელა დაინახავ, რა მოხდება

როცა ერთმანეთს კეთილი თვალებით უყურებთ, კეთილდებით. აბა ხშირად გამიღიმე... მე სხვანაირი გავხდები შენთვის. სულ სხვანაირი. და შეიძლება სხვასაც უკვე სხვა თვალით შევხედო და შენი გამოცდილება სხვაზეც გადავიტანო

ბედნიერია ის ადამიანი, რომელიც მუდმივად თავისი თავის გარდაქმნაშია, სულს აღამაღლებს, და ხარობს იმით, რომ უფრო და უფრო მეტს ეუფლება

ჩვენი სული ალმასია და ბრილიანტად უნდა ვაქციოთ

სკოლაში, ნებისმიერი სახის რეფორმა მხოლოდ მაშინ არის კარგი, თუ აუმჯობესებს და ხალისიანს ხდის ბავშვის ცხოვრებას

დაწყებით კლასებში ნიშნები არ უნდა იწერებოდეს

მადლიერება ერთ-ერთი ძალიან ღირსეული თვისებაა ადამიანისა. პიროვნება არ არსებობს მადლიერების თვისების გარეშე. მადლიერნი ვიყოთ ყველასი და ყველაფრის, მიუხედავად იმისა, თუ როგორ გვექცევა ყველა და ყველაფერი ჩვენ

მიეცით შვილს უფლება, იამაყოს თქვენით. თუ თქვენი შვილები თქვენით არ ამაყობენ, გამოდის, რომ თქვენი აღმზრდელობითი ძალა სუსტია

ნათქვამია - სადაც კარგი მასწავლებელია, იქ კარგი მოწაფეები არიანო

ნათქვამია - "გაუმარჯოს სიძნელეებს, იმით ვიზრდებითო". როცა სიძნელე აღარ აქვს ადამიანს არაფერში, მაშინ ჩიავდება, იჩაგრება. ძალებს აღარ იკრებს, ისედაც მიდის და რაღად უნდა გადახტომა? მაგრამ, როდესაც დახვდება ქვა და ღორღი, იქ უკვე წინდახედული უნდა იყო

გასაჭირში მყოფ ადამიანს, შეცოდება კი არა, უნდა დავეხმაროთ, იმიტომ, რომ შეცოდება წარსულია უკვე, ადამიანი კი მომავალში მიდის. რაც უფრო მეტს შევიცოდებთ, მით უფრო გავაჩერებთ ადამიანს თავის შინაგან განცდებში. უნდა გამოვიყვანოთ მდგომარეობიდან, წინ უნდა გავახედოთ. კი, მოხდა, რაც მოხდა, მაგრამ უკან გზა აღარ არსებობს. წინ უნდა ვიყუროთ. წარსული წარსულს ბარდება უკვე, ვეღარ მივუბრუნდებით. ხვალინდელი დღე კარზე გვადგას. მომავლისკენ უნდა მოაბრუნოს ფსიქოლოგმა ადამიანი, რომელიც რაიმე განსაცდელის გამო შოკში აღმოჩნდა

სწავლა უნდა იყოს სიხარულიდან სიხარულისკენ

არ არსებობს უნიჭო და ზარმაცი ბავშვი, არსებობს მხოლოდ შეზღუდული პედაგოგიკა

ნიშნები ერთად უნდა შევკრიბოთ და ჩავყაროთ კოცონში

მასწავლებლის წითელი კალამი უნდა ჩანაცვლდეს მწვანე კალმით და ხაზი გაესვას მოსწავლის დამსახურებებს შეცდომების ნაცვლად

ბავშვები ჰიპერაქტიურები კი არ არიან, არამედ მასწავლებლები არიან ჰიპერპასიურები

ავტორიტარული პედაგოგიკა შლის ახალ თაობას,.. რეფორმა უნდა მოხდეს მასწავლებლის ცნობიერებაში

ბავშვს უნდა განვითარება, თავისუფლება და აქვს დიდობის მოთხოვნილება

მასწავლებელს უნდა თავისუფლება მივანიჭოთ და დავარწმუნოთ, რომ მას შეუძლია იყოს შემოქმედი

ჩვენ შევკარით მასწავლებლები რით? - იმით, რომ მოამზადონ ბავშვები სახელმწიფო გამოცდების ჩასაბარებლად. იგივეთი შევზღუდეთ მშობლის აზროვნება და ცნობიერება. 10-ე, 11-ე, 12-ე კლასებში მთელი ყურადღება გამოცდების კარგად ჩაბარებაზეა გადართული. ეს წლები კი ისეთი დროა, როცა ბავშვის სულიერი მსოფლმხედველობა ყალიბდება. ჩვენ კი ეს დრო მოვახმარეთ არა სულიერ მსოფლმხედველობას, არამედ, რომ მოიცილოს რაღაცა გამოცდები, თანაც ისეთი გამოცდები, რომლებიც არ აინტერესებს არ უნდა, იძულებით აკეთებს ამას.

ყოველგვარი მასწავლებლის ამაღლებული ხმა მისი წყვდიადობის ნიშანია. ყვირილი, უხეშობა, ძალადობა, მშობლების გამოძახება, ორიანები და სხვა ამგვარი - ეს ყველაფერი სიბნელეა

სიმკაცრე მშობელმა უნდა შეცვალოს სამართლიანობით. თუ ბავშვმა სამართლიანობა ვერ დაინახა, აღზრდას მშობლისგან ვერ მიიღებს. ვერანაირი დასჯა, თუ სამართლიანად არ მიიღო ბავშვმა, აღზრდას ვერ შეასრულებს

დედის პირველი დობილი მისი ქალიშვილი უნდა იყოს და მერე ყველა დანარჩენი. მამის პირველი ძმობილი მისი ვაჟი უნდა იყოს და მერე ყველა დანარჩენი

ბავშვი მეგობრად უნდა გაზარდო, რომ მეგობარი გაიჩინო; მოყვარედ უნდა გაზარდო, რომ მოყვარე გაიმრავლო; პატრიოტად უნდა გაზარდო, რომ პატრიოტი გახდეს

მეგობრობის გარეშე არ გამოგვივა თანამედროვე ინდიგო ბავშვების აღზრდა, ტყუილია. არ ეცადოს მშობელი, რომ ზემოდან დაადგეს ბავშვს და თითით უჩვენოს - სად წავიდეს, სად არ წავიდეს, ვისთან იმეგობროს, ვისთან არ იმეგობროს

მასწავლებელი უნდა გახდეს მეტად აქტიური თავის შემოქმედებაში, ბავშვის სიყვარულში, მიდგომაში, იმედიანობაში,.. მასწავლებელმა თითოეულ ბავშვს თავისი გზა უნდა გაუხსნას. დიდ გემს დიდი არხის გახსნა სჭირდება

ჯობია სუსტად იცოდე შენი საგანი (თუმცა ესაც ცუდია), მაგრამ ბავშვი გიყვარდეს

ადამიანები ერთმანეთისთვის ვართ გაჩენილები

თვალმა დაინახოს, და მერე თქვას ენამ! რაც კარგად ვერ დაინახე, არ თქვა, თორემ შეგეშლება

პოეტური აზროვნება ცხოვრებას ალამაზებს

რა წინააღმდეგობაც არ უნდა შეგხვდეს, მიიღე, როგორც კიბის საფეხური

მეტი გიყვარდეს, მეტი პატივი ეცი, თავმდაბალი იყავი

პირველი მცნება არის რწმენა, უფლის რწმენა. ჩვენ რელიგიას პატივი უნდა ვცეთ, იმიტომ, რომ მან გაგვზარდა ჩვენ

ცხოვრების აზრი ჩვენი სულის სრულყოფაა. ამიტომ ვართ ამქვეყნად გაჩენილები

ოჯახი ფუძეა ჩვენი განვითარებისა, ჩვენი ცხოვრებისა. ეს პატარა სახელმწიფოა.

სიყვარული ორნაირია: მიწიერი და ღვთიური. ჩვენ ძალიან გავერთეთ მიწიერი სიყვარულით, რამაც ბევრი სარეველა გაგვიჩინა. უნდა შევძლოთ, რომ ღვთიური სიყვარულით გვიყვარდეს ერთმანეთი

შემკობა - ეს მშვენიერი მეთოდია ურთიერთობისა. ადამიანს კეთილი ვუთხრათ, მოვესიყვარულოთ, შევუწყოთ ხელი, რომ განვითარდეს, წინ წავიდეს, საკუთარი თავისა სჯეროდეს

ყველა დავეძებთ თავისუფლებას. ესაც ერთ-ერთი მცნებაა ჰუმანური საქართველოსი. თავისუფლება ისე კი არ უნდა იყოს გაგებული, რომ "აკეთე, რაც გინდა", არამედ, უნდა შეგვეძლოს - ავირჩიოთ

ყველა მივისწრაფით ბედნიერებისკენ. როგორ გავიგოთ ბედნიერება? ეს არის გაანალიზება იმისა, თუ როგორ ვაშენოთ ცხოვრება, რომ ყველა კმაყოფილი იყოს ჩვენს ირგვლივ

საქართველოში ყოველთვის იყო ეს ცნება - საერთო კეთილდღეობა - ზრუნვა ხალხზე, ერზე. ვიზრუნოთ არა მარტო საკუთარ თავზე, არამედ - ერთმანეთზე

ჰუმანური აღზრდა არის ჰუმანური საქართველოს მე-9 მცნება. როგორია ჰუმანური აღზრდა, ამას ბევრი განმარტება შეიძლება მოჰყვეს. თუმცა დიდწილად მეტყველებს ყველა დანარჩენი მცნება, - რწმენით, სიყვარულით, სიკეთით, სიხარულით აღზრდა

მიზეზს უთუოდ მოჰყვება შედეგი. ჩვენ ისეთ ცხოვრებაში ვცხოვრობთ, როგორი მიზეზებიც შევქმენით წარსულში, და ახლა კიდევ ვქმნით ახალ მიზეზებს მომავლისათვის

მასწავლებელი რისკის გარეშე მასწავლებელი არ არის

გიყვარდეს ყველა იცხოვრე სინდისით იშრომე ყველასთვის სასიკეთოდ

ყველა კლასიკოსი თავის მოძღვრებას მეცნიერებას კი არ უწოდებს, არამედ - მოძღვრებას, ხელოვნებას. ყველა კლასიკოსი თავისი მოძღვრებისთვის ერთიდაიგივე საფუძველს იყენებს. ეს არის - სახარება

გაეცი, რომ მიიღო

სიტყვა "ჰუმანური" ნიშნავს ადამიანს, რომელიც თავის თავში უკვდავებას დაეძებს, ღმერთს დაეძებს, რომელიც თავისი თავის შემეცნებაშია

ყველაზე ძნელი აზროვნების შეცვლაა. კახეთში ჯიუტ კაცზე ამბობენ, ვირზე შეჯდა და გადმოსვლა აღარ უნდაო

ცხოვრება წინააღმდეგობრივია. დინების წინააღმდეგ უნდა წავიდეთ. სათავეა ჩვენი ცხოვრების საწყისი, სათავისკენ უნდა ვიაროთ

ნამდვილი, ჭეშმარიტი ცხოვრება თუ გინდა, შენი აზრი უნდა გქონდეს, თუნდაც ათასმა გარწმუნოს სხვაში. "ჰკითხე ასსა, ქმენ გულისა, რა გინდა ვინ გივაზიროს!" რაც არ უნდა ბრძენმა გითხრას, ის გააკეთე, რაც შენ გჯერაო. და მაშინ ცხვარი აღარ იქნები, რომელიც არ კითხულობს ვის სად მიჰყავს იგი. თეთრი ყვავები უნდა ვიყოთ!

ჯერ მასწავლებელი ვინ არის, და მერე დანარჩენი ვიკითხოთ. შენობები არაა სკოლა. სკოლა მასწავლებელშია

მომავლის სკოლა ისეთი იქნება, როგორიც მასწავლებელი გვეყოლება. გინდა ევროპული ყაიდის შენობაში შეიყვანე და გინდა ქოხში, ის თავის საქმეს გააკეთებს

შვილებს ცოდნის ნაცვლად განათლება უნდა მივცეთ. განათლება და ცოდნა განსხვავდება ერთმანეთისგან

ყველაზე კარგი ცხოვრების წესი რა არის? - ვიყოთ მუდმივი მოსწავლე! მოსწავლე ვიყოთ ყველასთვის, მათთვის, ვინც ჩვენზე მეტი იცის

"მე ის ვიცი, რომ არაფერი არ ვიცი" - თუ ამ მცნებით ვიქნები, მე მუდამ ვეძებ ცოდნას ყველაში და ყველაფერში!

პედაგოგიკაში მეცნიერება არ არსებობს. ეს არის ხელოვნება, რომელიც შეიძლება ამოვზარდოთ

გწამდეს ბავშვისა, გწამდეს სიყვარულისა და გწამდეს შენი თავისა. ამ სამი რწმენით თუ მიხვალ ბავშვთან, და ამ სამი რწმენით თუ გაკვეთილს ჩაატარებ...

მასწავლებლებო, თვალებით სიყვარული გაუგზავნეთ ბავშვებს. თვალებს სულის ძალა მიაქვთ. დისტანცია არ აქვს ამ ენერგიას

მე მომხრე ვარ უზნაძისა, რომელმაც ქუთაისის სკოლაში, სადაც დირექტორი იყო, ნიშანი მოსპო. თუ ნიშანმა შეგიპყრო, ტყვე ხდები ნიშნისა, ცოდნა გავიწყდება

ერთი რჩევა მასწავლებელს - ბავშვი უნდა გიყვარდეს! თუ არ გიყვარს ბავშვი, არ გაიარო სკოლის დერეფნებში, არ შეხვიდე კლასში. გიყვარდეს ბავშვი! ის არაა დამნაშავე, შენი მოწაფე რომ გახდა

აღარ გაინტერესებს მომავალი, როცა წარსული გებღაუჭება, უკან გეწევა. ვიღაცის დარდი გაქვს, ვიღაცის ვალი გაქვს, ვიღაცას შენ მიმართ რაღაც ანგარიში აქვს,.. ეს ყველაფერი წინ არ გიშვებს, გაფერხებს. ამიტომ, ჩემო ძვირფასებო, ჩამოიცილეთ ეს ყველაფერი

ვერწმუნოთ სიკეთის ძალას და ვემსახუროთ საერთო კეთილდღეობას

გვწამდეს ჩვენი ახლობლებისა. ქმრისა გვწამდეს, ცოლის, შვილების, მეგობრების. ვიზრუნოთ ყველა მათგანზე

ჩვენს რწმენაში ბედნიერებაა ჩაქსოვილი. რაც უფრო ღრმად გწამს, მით უფრო ბედნიერებას მიაღწევ, მით უფრო გამარჯვებული იქნები ცხოვრებაში. რაც ნაკლებად გწამს, ბევრი ფეხწამოსაკრავი ქვა დაგხვდება წინ

ღმერთისა და ნათლის რწმენას, მათკენ მისწრაფებას სასწაულების მოხდენა შეუძლია. ჩვენი რწმენა ჩვენ ცხოვრებაში სასწაულებს შექმნის. რწმენა გვეხმარება ძალთა მოკრებაში, მიზნების მიღწევაში, საკუთარ თავზე გამარჯვებაში

რწმენაში მტკიცედ უნდა ვიდგეთ. ჩვენმა რწმენამ უნდა გაუძლოს ცხოვრების რყევებს, ცდუნებებს. რწმენის უმაღლესი დონე ღმერთის რწმენაა

რწმენა საქმეების გარეშე მკვდარია. რწმენა უნდა საქმეებით დავადასტუროთ. დავეხმაროთ, შევეშველოთ ადამიანებს. თანაგრძნობა გამოვუცხადოთ, იმედიანი სიტყვა ვუთხრათ, სიყვარული და მოთმინება ვარგუნოთ, მომსახურება, სამართლიანობა, მონანიება, მიტევება - ეს ყველაფერი რწმენის საქმეებია

რწმენა გამოიცდება და მკვიდრდება, როცა ყოველთვის თან დაგყვება, როცა ყოველთვის თან სდევს შენს ფიქრებსა და საქმეებს. არ შეიძლება რწმენა დროებით სადღაც შეინახო, მიატოვო და რწმენის გარეშე თუნდაც ერთი ნაბიჯი გადადგა. სადაც გწამს, იქ ხარ გამარჯვებული. როგორც კი რწმენას გადადებ, იქ ღვთიური ძალა შენი დახმარებისკენ არ ილტვის

თუ ჭეშმარიტად მორწმუნენი ვართ, მაშინ სიმშვიდე გვეუფლება. არ ვღიზიანდებით, არ ვწუწუნებთ, არც ვინმე გვძულს, არც არავისი არაფერი გვშურს. ეს არის რწმენა

რწმენა ჭეშმარიტების განცდაა

სიყვარული ყველაფრის შემოქმედი ენერგიაა. სიყვარული სიუხვის წყაროა

მთელი არსით შევიყვაროთ ცხოვრება. ჩვენ ცხოვრებისთვის გავჩნდით. არ შეიძლება ცხოვრება მთელი სულითა და გულით არ გვიყვარდეს. უნდა გვიყვარდეს ისეთი, როგორიც არის

ცხოვრება ადამიანებითაა სავსე. ადამიანების გარეშე ჩვენი ცხოვრება ვერ შედგება. ამიტომ, გვიყვარდეს ადამიანები. გვიყვარდეს ყველა. გვიყვარდეს მანამდე, ვიდრე ვინმეს შევხვდებით. გვიყვარდეს უპირობოდ. გვიყვარდეს იმიტომ, რომ ადამიანია. და თუ ჩვენიანია, რა თქმა უნდა, უფრო მეტად შეგვიყვარდება. ჩვენი შვილი, მეუღლე, ახლობელი, ნათესავი,.. მაგრამ, ყველა გვიყვარდეს უპირობოდ, იმიტომ, რომ ყველა, ისევე როგორც თითოეული ჩვენგანი, ღვთის შვილია

სიყვარული სილგრძელია, ქველმოქმედია, ყოველივეს იტანს, ყველაფერი სწამს, ყველაფრის იმედი აქვს, არ შურს, არ ყოყოჩობს, არ ამპარტავნობს, არ სჩადის უწესობას, არ ეძებს თავისას, არ რისხდება, არ განიზრახავს ბოროტს

გვიყვარდეს მშობლები ღვთიური სიყვარულით, და არასოდეს დავემდუროთ მშობლებს რაიმე მიზეზით. გვიყვარდეს ოჯახი, ჩვენი საძირკველი, სადაც ჩვენი ცხოვრების ფესვები იზრდება. ქმარი და ცოლი გვიყვარდეს, შვილები და ახლობლები, მეგობრები და მეზობლები. არ დავემდუროთ მეზობელს არაფრის გამო. თანამშრომლები გვიყვარდეს. უცხონი გვიყვარდეს, რომლებიც ჯერ არ გვინახავს. გვიყვარდეს გამვლელები, რომლებსაც პირველად ვხედავთ. და როგორც ჩვენმა მოძღვარმა, ჩვენმა იესო ქრისტემ გვითხრა, გვიყვარდეს ისინიც, რომლებსაც არ ვუყვარვართ, ვინც გვწყევლის, ისინიც გვიყვარდეს ჩვენ. იმათ არ ვუყვარვართ - ეს მათი ცოდვაა, ჩვენ არ დავიდოთ ცოდვა. გვიყვარდეს ყველა, როგორც ღვთის შვილები

მოვლა უნდა სიყვარულს, როგორც ქოთანში ყვავილს. ვეფეროთ სიყვარულს. შევმატოთ ჩვენ სიყვარულს სიმშვენიერე: სახის გამომეტყველებით, ხმით, ხელების მოძრაობით, მოთმინებით, დათმობით, ალერსით,.. გავამშვენიეროთ ჩვენი სიყვარული

არ გავანელოთ ჩვენ გულებში სიყვარული. პირიქით, უნდა ავაგუგუნოთ! ვიყოთ სიყვარულით სავსენი! ვიყოთ სიყვარულში გულუხვნი და სულგრძელნი! ჯობია დავიწვათ სიყვარულში, ვიდრე ვიყინებოდეთ სიყვარულის გარეშე!

ჯობია დავიწვათ სიყვარულში, ვიდრე ვიყინებოდეთ სიყვარულის გარეშე!

სიყვარული საქმეთა გარეშე ფუჭია. ამიტომ, საქმით დავამტკიცოთ ჩვენი სიყვარული. უხვად გავცეთ ჩვენი სულიერი განძი - ღიმილი. გაიღიმეთ 😊 გიხდებათ ღიმილი ღმერთმა ჩვენი მშვენიერებისთვის გვაჩუქა ღიმილი ადამიანებს

სიხარული ატარეთ ყოველთვის. დარდი ძალებს წაგართმევთ, სიხარული ძალებს შეგმატებთ, რომელი ჯობია ცხოვრებისთვის? ამიტომ, გიხაროდეთ: რომ გაიღვიძეთ, რომ ვიღაცა დაინახეთ, რომ ჩიტის ხმა მოგესმათ, თუნდაც რომ შვილმა, შვილიშვილმა გაგაბრაზათ, ქმარმა რომ დაიგვიანა, ესაც გიხაროდეთ, ბოლოს ხომ დაბრუნდა სახლში. გიხაროდეთ ყველაფერი! ეცადეთ, სიხარული დაინახოთ იქაც, სადაც თითქოსდა არაფერია სასიხარულო, იმიტომ, რომ ყოველთვის, ყველგან რაღაცაა სასიხარულო

დაეხმარეთ ერთმანეთს შვილების აღზრდაში. ადამიანებს გვიჭირს შვილების აღზრდა. შევეშველოთ ერთმანეთს სიტყვით, საქმით, დაცვით...

დაეხმარეთ ერთმანეთს მარტოობაში. ვინც მარტოობას გრძნობს თქვენ შორის, იპოვოს ასეთივე მარტოობაში მყოფი და მას შეუქმნას გარემო, რომ მარტო აღარ იყოს. მაშინ, თქვენც დაგავიწყდებათ თქვენი მარტოობა

უნდა მოვიკლოთ, რომ გაჭირვებულს შევეშველოთ. აი ასეთია სიყვარული. იტყვიან ხოლმე - ლუკმა პური გამოიღო და სხვას გაუწოდაო - ეს არის სიყვარული!

უცხო იყოს ჩვენთვის: სიძულვილი და ბოროტება, შური და შურისძიება, გაღიზიანება და განკითხვა, ჭორაობა და ლაყბობა. ეს არ არის ჩვენი საქმე. ეს ყველაფერი სიყვარულს დაგვინგრევს. თუ სიყვარული გაგვინელდება, ბედნიერებაც გაგვექცევა. თუ სიყვარულს ავანთებთ გულებში, ბედნიერება არ მიგვატოვებს. ანთებული სიყვარული ბედნიერებას ადნობს ჩვენ გულებში!

მიყვარს, როცა ცხოვრებაში გზასაცდენილს სიყვარულით ვმკურნალობ. სიყვარულით უმკურნალეთ ყველას, და თქვენც ასევე გიმკურნალებენ, თუ საჭირო იქნება

გაიმეორეთ გულში ეს: "მე ვღებულობ ბედნიერი ცხოვრების კანონს - ვიცხოვროთ სიყვარულში" ასეც მოვიქცევი - ვიცხოვრებ სიყვარულში დიახაც! მთელი წელიწადი - 365 დღე და მერეც, ვიცხოვრებ სიყვარულში! გამოვცდი ჩემ თავს სიყვარულში!

მხოლოდ ჩვენ - ადამიანებს - გვაქვს ნიჭი შემოქმედებისა. მხოლოდ ჩვენ შეგვიძლია შევქმნათ ახალი, გავალამაზოთ ცხოვრება. ამ ნიჭს შემოქმედება ჰქვია და ეს არის უფლის ძალა ჩვენში

მივმართოთ ჩვენი აზრი, ჩვენი ძალები შემოქმედებისკენ. მაგრამ, რა შევქმნათ? პირველ რიგში იცით რა? - შევქმნათ საკუთარი თავი! საკუთარი თავი უნდა ავაშენოთ, ვიდრე სახლს ავაშენებთ!

ჩვენ უნდა გავხდეთ ღირსეული ადამიანი! ნათქვამია “შენ ადამიანად დაიბადე, მაგრამ ადამიანი უნდა გახდეო" გაადამიანურება მთელი ცხოვრება გვჭირდება ჩვენ

დაიხსომე ეს! ჩაიდე გულში, რომ უნდა გახდე გამოჩენილი, დიდსულოვანი და კეთილშობილი

უნდა ჩამოვიცილოთ ყველაფერი, რაც გვირთულებს ადამიანებთან ურთიერთობას, რაც ხელს გვიშლის, რომ ჩვენი ყოფა ახლობლებისთვის, გარშემომყოფებისთვის სასიხარულო გავხადოთ

იცით როგორ უნდა ვიცხოვროთ? რომ ჩვენი ყოფა ჩვენმა ახლობლებმა ღვთის წყალობად მიიღონ - რა კარგია, რომ შენ ჩვენთან ხარო. რამდენი მადლი, სიკეთე და სიხარული მოგაქვსო

ბებიებმა იციან ხოლმე - "ჩემო სიხარულო" - ბავშვებს ეფერებიან. ასე მოეფერეთ "ჩემო სიხარულო" სხვასაც

უნდა სრულვყოთ საკუთარი თავი, ისე, რომ ჩვენ ღმერთის საჩუქარი გავხდეთ. გაიხადეთ სული ღმერთის საჩუქრად!

არსებობს სამყაროს კანონი: ღებულობს ის, ვინც გასცემს. ღებულობს იმდენს, და ცოტა მეტს, რამდენსაც გასცემს. რად გვინდა ძალიან ბევრი? იმდენი მოგვეცემა, რამდენიც ჩვენ ცხოვრებას გაალამაზებს. გაეცი და მიიღებ! გაეცი ღიმილი, დახმარება, სითბო, თავშესაფარი, თანაგრძნობა, სიყვარული გაეცი! რაც გაქვს, ის გაეცი!

არ დაიხსომო რომ გაეცი, არც დააყვედრო - გახსოვს, მე შენ რა გაგიკეთეო - ეს აღარ არის გასიკეთე. გაცემა და არას შური, ჩუქებისა არ მოწყენა. რუსთაველის ანდერძია ეს

არავისთვის არაფერი არ დაგენანოს. რაც დაგენანება სხვისთვის, ის შენ უკან დაგწევს

რაც არ უნდა დიდხანს ვიცხოვროთ, მაინც ვერ ვიტყვით, რომ ჩვენ უკვე შევიმეცნეთ ცხოვრება. ამრიგად, ყველაზე კარგი გზა ცხოვრებაში - მოსწავლის გზაა. ყოველთვის მოსწავლე ვიყოთ და ვსწავლობდეთ. რას ვსწავლობდეთ? ყველაფერს, რაც არ ვიცით, რასაც ვერ ვაკეთებთ. რისთვისაც ჯერ არ მიგვიღწევია. მივაღწიოთ. დავეუფლოთ. თანაც, ამ სწავლაში ჩვენს ძალებსაც დავინახავთ, თურმე რამდენი შეგვძლებია. თურმე ღმერთსაც ცოტათი მივუახლოვდით. მისი ძალები გადმოგვეცა

ვიცხოვროთ, არა მასწავლებლის, არამედ - მოსწავლის ცხოვრებით. არ ვიყოთ ყველასთვის დამრიგებელი. შევთავაზოთ, ვურჩიოთ, როცა ჩვენგან რჩევა უნდათ. მაგრამ როცა არ უნდათ - გავჩუმდეთ. გავერიდოთ იმ გარემოს, სადაც არ მიიღებენ ჩვენგან რჩევას, დარიგებას, იმიტომ, რომ ფუჭად დავკარგავთ ენერგიას

არ ესწრაფოთ მასწავლებლობას. არ მოახვიოთ სხვას თქვენი აზრები

ავივსოთ გული და სული სიბრძნით, იმიტომ, რომ სიბრძნეა ყველა ბედნიერების ერთ-ერთი ოქროს გასაღები

რასაც ვის გაუკეთებ, შენთვის აკეთებ, იცოდე!

ჩვენ ცხოვრებას სამი კითხვა განსაზღვრავს: რა გავაკეთეთ, სად, და ვისთვის

ახალგაზრდული სული სხეულს აცოცხლებს, ამოძრავებს, ძალებს ჰმატებს, იმიტომ, რომ სულია ჩვენი სხეულის ძალა და არა სხეული - სულის ძალა

მარადიულობის სიმართლე სულის მშვენიერებაშია. რაც უფრო გაამშვენიერებთ სულს, მით უფრო მარადიულობას ეზიარებით!

წყნარი, კლასიკური მუსიკის მოსმენა რელაქსაციური წესით, სამკურნალოა

1. ვიცხოვროთ რწმენით 2. ვიცხოვროთ სიყვარულში 3. ვიცხოვროთ შემოქმედებაში 4. ვიყოთ უშურველნი 5. ვიცხოვროთ მოსწავლის ცხოვრებით 6. გავზომოთ ჩვენი ცხოვრება დღეებით 7. გამოვაბრწყინოთ ჩვენი სულის ახალგაზრდობა

ბედნიერება თქვენს ხელთ არის

ყველაფერი თქვენს ხელთაა. არავის არაფერზე არ ეწუწუნოთ. თქვენს ხელთაა თქვენი ბედი და თქვენი სიყვარულიც

ყველაზე კარგი მშენებლობა საკუთარი ბედისა სხვის ბედზე ზრუნვა არის

თითოეული ჩვენი ქცევა მიზეზია მომავალი შედეგებისა

მიზეზს უთუოდ მოჰყვება შედეგი. არ არსებობს მიზეზი, რომელსაც შედეგი არ მოჰყვება. რაც უფრო დიდია მიზეზი, შედეგიც მეტია. რაც უფრო სუსტია მიზეზი, შედეგიც ანალოგიურია.

ბედნიერება განუწყვეტელი შინაგანი სიხარულია, როცა ქმნი სასიკეთო საქმეს

ოჯახში დედის სიბრძნე სიმშვიდეს ამკვიდრებს, იმიტომ, რომ სიმშვიდის დამკვიდრებას სიბრძნე უნდა. ისე სიმშვიდე არ მოდის. ისე მოდის - შეხლა-შემოხლა, გაუგებრობანი, უსიამოვნებანი და წყენა

დედის გულს შეუძლია ოჯახის, თავისი შვილების მომავალი განჭვრიტოს. ბრძენი ქალი ბევრი რამის დამნახველია მომავალში, და დაინახავს რა მომავალს, უკვე ახლავე საძირკველს ჩაყრის, რომ ეს მომავალი შედგეს. ვითარებებს შექმნის, რომ მომავალი არ გაექცეს ხელიდან

ბედი დროში და სივრცეში ყალიბდება. თუ დრო და სივრცე გავუშვით ხელიდან, ბედი ხელიდან გაგვეშვება

აღმოსავლეთი ამბობს, ნებისყოფა ღმერთია ადამიანშიო. რა საკვირველია ღმერთი ერთია, მაგრამ თვითონ ნებისყოფა ღმერთის ძალაა

ყველაფერი, რაც ჩვენს ირგვლივ არის, მთელი სამყარო ღმერთის ნებაზეა დამოკიდებული. მან რომ ერთი დაიჩურჩულოს თავისთვის, ჩვენ ყველანი გავქრებით. არც სამყარო გვეცოდინება და არც არაფერი არ იქნება. ის იქნება, რაც მას სურს. მის ნებაზე ვართ დამოკიდებულნი. გვჯერა, რომ მისი ნება სიკეთე და სიყვარულია, ამიტომ, ღმერთის რწმენის იმედით ვცხოვრობთ, ვქმნით და ვაშენებთ

ადამიანი მაშინ კი არ ყალიბდება როგორც მებრძოლი, როცა ყველაფერი აქვს, არამედ მაშინ, როცა უჭირს

გაჭირვებაში არ არსებობს გამოუვალი მდგომარეობა. გაჭირვება ჩვენ საგანგებოდ გვეძლევა, რომ გამოსავალი მოვნახოთ. როცა იპოვი გამოსავალს და გაარღვევ, მაშინ დაინახავ, როგორი ძლიერი ყოფილხარ, როგორი ნებისყოფა გქონია და იქვე იგრძნობ ბედნიერებას

ბედნიერება რომ მოიპოვოთ, ამისთვის საჭიროა ბრძოლა, ნებისყოფა, ხვალინდელი დღის დანახვა და სიხარულით სვლა ამ გზაზე

თუ გაჭირვებული ხარ და გინდა გაჭირვება მოგცილდეს, სხვას გაუწოდე შენი გაჭირვებული ხელი და იმას დაეხმარე. ნახე რამდენი მოგივა!

თუ დარდი შემოგეყარა გულს, სხვას გადაუყარე დარდი, და ნახე როგორ გადაგეყრება შენც დარდი. არ უნდა იფიქრო მარტო შენ თავზე. "ასე ვარ, ისე ვარ, ძლივს დავდივარ, ფეხი ვერ გადამიდგია,..." გასაგებია, მაგრამ შენზე უარესად რომ სხვა არის?

სიტყვები - "მოხუცი", "ბებერი" არ იხმაროთ არავის მიმართ ძალიან გთხოვთ. ადამიანი მანამ არის ახალგაზრდა, ვიდრე ფეხზე დგას და შეუძლია კეთილი სიტყვა თქვას

გამოცდილება ისეთი რამ არის, წლები უნდა მის დაგროვებას. და თუ გამოცდილების გათვალისწინებით მიიღებ გადაწყვეტილებებს, შეცდომებს უფრო ნაკლებად გაიმეორებ, იმის მიხედვით, თუ როგორია გამოცდილება

პატივი ვცეთ ბებიებს და პაპებს. "კომუნისტებად" შეურაცხმყოფელად არ მოიხსენიოთ. ისინი ახალ ცხოვრებას ესწრაფვოდნენ, სამშობლო უყვარდათ და როგორც იცოდნენ, ისე აშენებდნენ ქვეყანას.

ერთგულება სიყვარულის გამოცდაა. თუ გიყვარს ვინმე, მარტო ერთგულებით შეგიძლია დაუმტკიცო. კიდევ რით დაუმტკიცებ? საჩუქრებით? ვერა! მარტო ერთგულებით!

ვინც გიყვარს, მისთვის იწვი, ანთებული სანთელივით ხარ მისთვის!

გინდათ, რომ სიყვარული დაამტკიცოთ? ერთადერთი გამოცდა სიყვარულისა, ერთგულებაა! ერთგულება პატივისცემაში, ურთიერთობაში, განცდებში,.. ყველაფერში

ერთგულება არის სულის თვისება. როგორც სახეს, გარეგნობას ვიწესრიგებთ და ვილამაზებთ ხოლმე, ასევე შეგვიძლია სულის ეს თვისება - ერთგულება ჩამოვქნათ, ჩამოვალამაზოთ, ერთგულები გავხდეთ ყველაფრისა

ერთგულება სიყვარულის გამოცდაა, სიყვარული კი თავი და ბოლოა ჩვენი ცხოვრებისა

სხვას რომ აბედნიერებ, ეს ყველაზე დიდი ბედნიერებაა შენი

გეჩქარება, მაგრამ, ყველაფერი შეიძლება გადაიდოს ხვალისთვის, ყველაფერი. არაფერი არ არის გადაუდებელი, გარდა სიყვარულისა

ვინც პირველი დაუთმობს, ის არის ბრძენი. ვინც არ დაუთმობს, უგუნურია. ასე რომ, მოასწარით ერთმანეთს შორის დათმობები, რომ ამ დაუთმობლობას რაღაცა არ მოჰყვეს

არასოდეს გადადოთ სიყვარული არცერთი წუთით! გიყვარს? თვალებით გიყვარდეს სიტყვით გიყვარდეს საქმით გიყვარდეს კოცნით გიყვარდეს ჩახუტებით გიყვარდეს მიტევებით გიყვარდეს დათმობით გიყვარდეს ყველაფრით გიყვარდეს ესენი საქმეებია სიყვარულისა

თუ არ დაუთმობ ქმარს / ცოლს, ეს ნიშნავს, რომ არ გიყვარს. თუ გინდათ, საკუთარი თავი გამოსცადოთ სიყვარულში, აბა ნახეთ როგორ უთმობთ ერთმანეთს. დათმობა საქმეა სიყვარულისა

სიყვარულს საქმეები უყვარს. საქმეების გარეშე სიყვარული მკვდარია. კოცნა, მოფერება, გაჭირვებაში ერთად დგომა, თავდადება, დათმობა... ამაში იწრთობა ნამდვილი სიყვარული

გინდათ ბედნიერები იყოთ? სხვა არაფერში არ არის ბედნიერება, გარდა სიყვარულისა. ქონებაში ბედნიერებას ვერ იპოვით. ვერც მოგზაურობაში ვერ იპოვით ბედნიერებას. ბედნიერება ორი პიროვნების ურთიერთობაში იბადება

თუ ბავშვს უყვირი, და იქვე იცი, რომ არ შეიძლება ყვირილი, არ არის ეთიკური, ნორმალური,.. მაშ, ვინ უფრო დამნაშავეა, ბავშვი თუ შენ?

ცხოვრებაზე და გამოცდილებაზე ძვირფასი არაფერი გვაქვს ჩვენ. თუ ჩავუფიქრდებით სად რა შეგვემთხვა, როგორ გავართვით თავი, როდის რა როგორ მოხდა,.. თუ ასეთ მომენტებს გავაანალიზებთ ხოლმე, უთუოდ რაღაცა სიბრძნე დაგვრჩება

წიგნებს გარდაქმნა თუ არ მოვაყოლეთ, ჯობია არც ვიკითხოთ. თვალსა ვღლით, დროსა ვკარგავთ და გონებას ვაჩიავებთ. წიგნი ყოველთვის კი არ არის წყარო. თუ წიგნი შენს სულში არ გადმოსახლდება, კითხვას აზრი არა აქვს

ნათქვამია - როცა უბედურებას განიცდი, შენი სიხარული არ შეანელო, და იცოდე, რომ კარიბჭესთან ბედნიერება გელოდება. და პირიქით - როცა ბედნიერებას განიცდი, გაიხარე, მაგრამ იცოდე, რომ უბედურება გელოდება, იმიტომ, რომ ერთს მეორე მოსდევს. ამ ცხოვრებაში აღმართებიც იქნება და დაღმართებიც. რას როგორ მიიღებ და გაუძლებ, იმის მიხედვით ან ზემოთ ადიხარ, ან დაბლა ჩამოსრიალდები

მოვიდა სეტყვა და დახვდა ქვაო

არავინ არის შენი მტერი, არავინ არის შენი მეგობარი, ყველა შენი მასწავლებელია

ქვა ვიყოთ! გულით კი არა, არამედ - ჩვენი ნერვებით, გაძლებით,.. რომ, რაც არ უნდა წარღვნა დაგადგეს თავზე, ის წავა და ჩვენ ხელახლა ამოვბიბინდეთ თავიდან

ძილი სიკვდილის ძმა არისო

დღეების დაკარგვა ნიშნავს იმას, რომ იმ დღეს ჩვენ მკვდარი ვართ. რა არის სიცოცხლე? - სიცოცხლე არის ის პროცესი, როცა რაღაცა უკეთესობისკენ მიგყავს. მოცემულ დღეს, თუნდაც სულ მცირე, თუ არ წაიყვანე უკეთესობისკენ, ჩათვალე, რომ არ იყავი შენ იმ დღეს. იყავი, მაგრამ ფასი არ ჰქონდა

სიცოცხლე ქმნაა. სიცოცხლე წინსვლაა. რაც არ უნდა შეგემთხვას, ცუდი თუ კარგი, ეს ყველაფერი საფეხურია. ამიტომ, განიცადე როგორც საფეხური. ზოგ საფეხურზე ძნელად აფორთხდები, ზოგზე ფეხიც დაგიცდება, მაგრამ მაინც უნდა აფორთხდე. ზოგზე თავისუფლად აიქროლებ და ახვალ მაღლა. თუ ასე შეხედავ ცხოვრებას, მაშინ შეგიყვარდება ეს ცხოვრებაც, იმიტომ, რომ მეტს მოგიტანს. მეტ სიხარულს, წარმატებას, ბედნიერებას, სახელს განგიდიდებს, რომელსაც მერე შვილებს დაუტოვებ... აი რას მოგიტანს დღის პატივისცემა!

მინდა გისურვოთ, რომ გამარჯვებულები იყოთ ყოველ დღეზე. დღე თქვენი ძროხა ყოფილიყოს, რომელიც ძალიან უხვად იწველება

დრო ყველაზე ძვირფასია რაც ჩვენ გვეძლევა. ჩვენ კი არ ვუფრთხილდებით ამ დროს. ყოველთვის უნდა ავწონოთ: ღირს იქ წასვლა? ღირს ამ წიგნის კითხვა? ღირს ტელევიზორის ჩართვა და ამ რაღაცის ყურება? - იქიდან თითქოს ნარეცხს მასხამენ თავზე, სულ რაღაცისკენ მეწევიან, რაღაცას მარწმუნებენ...

არ დახარჯოთ თქვენი თვალები ბაზრობის საყურებლად. არ დახარჯოთ თქვენი ყურები უაზრობის მოსასმენად, ცუდი მუსიკა, ტელევიზორი... არ დახარჯოთ თქვენი დრო დროის სატარებლად. არ გვაქვს იმდენი დრო, რომ გავატაროთ

თითოეულ თქვენგანს გაქვთ ისეთი საჩუქარი, რომელიც იმდენად დიდია, რომ ვერ დაფასდება, ვერც აიწონება. ეს არის - თქვენი საკუთარი თავი

მე ჩემ თავს გაჩუქებთ, რომელშიც თითოეული თქვენგანის სიყვარული ჩავდე. ვიდრე არ მენახეთ, მიყვარდით, რომ გნახეთ, ორჯერ მეტად შემიყვარდით, თუ დავილაპარაკებთ, სამჯერ მეტად შემიყვარდებით არასოდეს არავინ არ მძულს, მიყვარს და უფრო და უფრო მიყვარდება

სულელ ადამიანთან დიდხანს არ უნდა იყო, თორემ თავისკენ გადაგიბირებს. იყავი უფრო ჭკვიანებთან ახლოს, მათთან ისაუბრე, მათგან ისწავლე და რაც გაკლდა იმასაც შეივსებ

ბევრი კარგავს სულს, ჩხუბში, უგონო ქცევებში, ბილწსიტყვაობაში, ცუდ საქმეებში, უსაქმურობაში,.. ნაცვლად იმისა, რომ გაამდიდროს სული, იმასაც კარგავს, რაც მოიტანა თან

ერთადერთი, რასაც წავიღებთ, მარტოოდენ სულია, სხეულიც სადღაც ჩაეფლობა, ჩაესვენება, მაგრამ სული ვერსად ვერ ჩაესვენება, ის უკვდავია. რატომ იყოს უკვდავი და თანაც სადღაც ჩაძირული? არ ჯობია, ავამაღლო? მით უმეტეს, ნათქვამია - მთელი მიწიერი ცხოვრება უკვდავებისთვის მომზადებააო

ლამაზი იეროგლიფები წერეთ, თქვენზე ათასჯერ ლამაზი, რომ მერე იმისთანა გახდებით, როგორსაც დაწერთ

ოღონდაც ვიღაცას გამოვადგე და შემიძლია მთელი საათები ვირბინო, სხვისთვის ვიმუშაო, არ დავიღლები, არც ვიწუწუნებ... სულ ყოველთვის მინდა, რომ მტლად ვედებოდე ვიღაცას

არა ვშფოთავ, იმიტომ, რომ ყველაფერს ვუყურებ, როგორც გაკვეთილს. რატომ უნდა ვიშფოთო კაცო? რა მაქვს საშფოთველი, როცა ცხოვრებაში ვარ და გამოცდილებას ვიძენ. ან კარგ გამოცდილებას შევიძენ, ან ცუდს. ერთიც გამომადგება და მეორეც, თუ გონივრულად მოვიქცევი

შიში უნდა დაკარგოთ ყველაფრისა, სიკვდილის შიში პირველ რიგში. რაც გარდაუვალია და ვერსად გაექცევი, რატომ უნდა გეშინოდეს იმისი?

აკეთე კეთილი საქმე და დაცვა ყოველთვის გეყოლება. ერთი ანგელოზი კი არა, შეიძლება 12 მოგიჩინონ, რომ რაც შეიძლება მეტად იყო დაცული, რათა ეს საქმე გაკეთდეს, იმიტომ, რომ ამ საქმეს საზოგადოება მიჰყავს წინ

კეთილი იყავი, მოყვარული იყავი, შენი კი არ ეძებო, სხვის სასიკეთოდ იღვაწე და შენ იმდენი მოგეცემა, რამდენიც გჭირდება

არ შეგშურდეთ არავისი არაფერი. შური ორგანიზმს დააზიანებს და ავადმყოფობას გამოიწვევს

ზოგიერთი რაღაცა, რაც არ გამოგდით, შეიძლება დამარცხებად მიიჩნიოთ. თუმცა ამ დამარცხებაში გამარჯვება იბადება. ჩვენ ყოველთვის შეგვიძლია გამარჯვებული ვიყოთ, იმის მიხედვით, თუ როგორ შევხედავთ ჩვენს ცხოვრებას

ყველა ბავშვს თავისი თანდაყოლილი ნიჭიერება მოჰყვება. ჩვენი ვალი რაღაა? - ეს ნიჭიერება განვუვითაროთ, გავუღვიძოთ, გავუძლიეროთ, ხელი შევუწყოთ, გასაქანი მივცეთ

დედის გული, თუ მართლაც უნდოდა დედას ბავშვი, სიბრძნით არის სავსე, და ეს სიბრძნე არასდროს არ გიღალატებთ ბავშვის აღზრდაში

ახალგაზრდობაში ვერ ვგრძნობთ ხოლმე დროს. გვგონია, რომ ძალიან ბევრი დრო გვაქვს. ყოველ წუთს, საათსა და დღეს დიდი მოფრთხილება სჭირდება

- გინდათ ბავშვს თქვენი თავი აჩუქოთ? აჩუქეთ თქვენი სრულყოფილება, თქვენი ზრუნვა, რომ თვითონ გახდეთ მისაბაძი, იშვიათი კულტურის მატარებელი. შვილისთვის საუკეთესო საჩუქარი თვითონ მშობელია

თქვენ უნდა გაიმარჯვოთ აღზრდაში, რათა თქვენმა შვილმა გაიმარჯვოს ცხოვრებაში

მშობელი უნდა იყოს შრომაში, საქმიანობაში, ოჯახთან ურთიერთობაში გამარჯვებული, რომ ასეთი გამარჯვებულის განცდა მიანიჭოს ბავშვს

ყველაზე დიდი გამარჯვება, ფილოსოფოსებს აქვთ ნათქვამი, საკუთარ თავზე გამარჯვება არისო

როცა გაიმარჯვებს საკუთარ თავზე, ბედნიერი გახდები. თურმე, ადამიანს შეუძლია საკუთარ თავს ფლობდეს. დააკვირდით თქვენ თავს, ფლობთ საკუთარ განცდებს? გაქვთ იმის ნებისყოფა, რომ ის აკეთოთ რაც საჭიროა, და არა ის - რაც გინდათ? ეხლა რომ რაღაცები გვინდა, შეიძლება ესენი ზედმეტი იყოს, უფრო დიდი წინ გველოდებოდეს და დროს კი სხვა რამეში ვხარჯავდეთ. არადა ის, რაც წინ გველოდება, ეხლა უნდა ვთესოთ. რასაც დავთესავთ, ის არ უნდა მოვიმკათ? მაგრამ, თესვა რომ გვეზარება? ამრიგად, მოსამკელიც შეიძლება აღარ გვქონდეს

მივიღოთ დამარცხება, როგორც მომავალი გამარჯვების პირობა, და გამარჯვება, როგორც მომავალი დამარცხების პირობა. იმიტომ, რომ ერთს მეორე მოსდევს

თუ მშობელმა რაღაცა დაგაკლოთ აღზრდაში, მიაშველეთ ამას თვითაღზრდა. მშობელს შეიძლება შეეშალა, ან არ იცოდა, ან დრო არ ჰქონდა, ანა პურის ფული უნდა ეშოვა,... მაგრამ სიცოცხლე ხომ მოგცა. გამოასწორე!

აღზრდაზე დიდი თვითაღზრდაა, როცა საკუთარ თავს შენვე დაუწყებ გამოჩორკნას. თუ ჩვენ საკუთარი თავის აღზრდით დავკავდებით, რამდენიმე წელიწადში შესაძლებელია ანგელოზების დონემდეც კი ავმაღლდეთ. შეგვიძლია გავხდეთ კეთილი ბუნების ადამიანები, რომლებისგანაც სიკეთე და დადებითი ემანაცია მოდის

თუ ჩვენ ბავშვებს კონკურსებში, ოლიმპიადებში გამარჯვებისთვის წავაქეზებთ და გამარჯვების ჟინს ჩავუნერგავთ, ამან შეიძლება გამარჯვება ასწავლოს, მაგრამ იქვე ასწავლოს ეგოიზმი, შური, სიძულვილიც კი და მტრობაც ჩაუსახოს ბავშვს. აბა გადახედეთ სპორტსმენებს, უყვართ ერთმანეთი?

ქართული ბალადისა არ იყოს - "იქნება ვეფხის დედაი ჩემზე მწარედა სტირისა, წავიდე, სამძიმარ ვუთხრა შვილისაო". აი ასეთი დედობაა დედობა, და არა ის, რომ ჩემი შვილი შენ შვილსა სჯობდეს

მიზანი თუ არ არის, არც გამარჯვებაა. რაც უფრო დიდია მიზანი, მით უფრო დიდია გამარჯვება. დიდ მიზნებს რომ ვეტანები, დიდი ძალები მჭირდება და უფრო ძლიერი ვხდები. პატარა მიზნებს რომ ვეტანები, იმ დონისა ვხდები, რა ძალებსაც ვხარჯავ. აღმოსავლური ანდაზა - ჩვენ იმ ძალებს ვიძენთ, რასაც გადავახტებით

როგორი ცოდვაა ადამიანი, რომელიც უკვალოდ გაქრება. იყო ჩიტი მგალობელიო, იჭიკჭიკა, იჭიკჭიკა, წავიდა და არაფერი არ დაგვრჩა მისგან. უკვალოდ გაქრა. კვალი! კვალის დატოვებას კი მიზანი უნდა - კეთილშობილობით სავსე მიზანი. მარტო მე, მე, მე კი არა, ჩემმა მიზანმა რაღაც სარგებელი უნდა მოგიტანოთ, თქვენ უნდა გარგოთ. მეც იმდენი დამრჩება, რამდენსაც თქვენ კარგს გაგიკეთებთ

რომ მიიღო, უნდა გასცე ჯერ! სიყვარული, პატივისცემა, ერთგულება, ქონება,.. გაეცით და მიიღებთ

მიზნის მიღწევა, დროის, ფიზიკური და სულიერი ძალების მსხვერპლად გაღებას მოითხოვს

მიზნისკენ სვლის პროცესი უკვე არის გამარჯვებისკენ სვლა

მარტონი მიზნებს ძნელად ვაღწევთ ან ვერც კი ვაღწევთ

მიზნის მიღწევაა გამარჯვება, თუ მიზანი არაა, გამარჯვებაც რა თქმა უნდა, არ იქნება

როცა მიზნად ისახავ რაღაცას, თუ იმ მიზანს ათიანში ვერ მოარტყამ, ცხრიანში მაინც მიხვალ, რვიანში მიხვალ და ესეც გამარჯვება იქნება

აი ეს არის ნამდვილი მიზანი - საკუთარ ძალთა სრულყოფა

შრომა ჩვენი ნიჭის სალესია. სადაც ეს სალესი არა გვაქვს, ათასი ნიჭიც რომ გვქონდეს, არაფერი გამოვა. ნიჭი ჩახმება

ნიჭი თესლივით არის, თუ დროულად არ გააღვივე შრომით, ეს ნიჭი ჩახმება

ნიჭს სალესი უნდა. ეს არის - შრომა და შემოქმედება

კაცი, რომელსაც შრომა არ უყვარს, ნაკლები შეხვდება. არადა, მისი წილი ყველაფერი, სიმდიდრე, ქონება, წინსვლა, თანამდებობა,.. უკვე იყო მისთვის გამზადებული.

გამარჯვებულია ის, ვინც თავის ნიჭს შრომის სახით სალესი მოუნახა, ვისაც უყვარს შემოქმედება

ყველაზე კარგი აღზრდა მაშინაა, როცა ბავშვი მაგალითს ხედავს

გამარჯვებული ის არის, ვინც თავის გამარჯვებას არ ეძებს სხვის დამარცხებაში

გამარჯვებულია ის, ვინც სხვასაც ეხმარება გამარჯვებაში

დაეხმარეთ მეზობელს, დაეხმარეთ მეუღლეს, დაეხმარეთ სიდედრს, სიმამრს, ყველას, ვისაც კი იცნობთ და შეიძლება სჭირდებოდეს თქვენი დახმარება. ვისაც სჭირდება და ხედავთ, რომ მას თქვენი დახმარებით გაუადვილდება ან გამოუვა რაღაცა, უნდა შეეშველო, და მისმა გამარჯვებამ უნდა გაახაროს შენ

ჰუმანურ პედაგოგიკას მთავარი საფუძველი სულიერება აქვს, რომელშიც ღმერთის რწმენაც და სულის უკვდავებაც არის ჩადებული. ასევე ისიც, რომ ეს ცხოვრება, რომელიც მონაკვეთი არის ჩემი მარადიული ცხოვრებისა, როგორ უნდა გავლიო აქ და რით უნდა წავიდე იქ. ხელცარიელი თუ ხელდამშვენებული

თუ გინდა გამარჯვება, დამარცხების ფასიც უნდა იცოდე. თუ გინდა კეთილი იყო, ბოროტი უნდა იცოდე. თუ გინდა გიყვარდეს, უნდა იცოდე რა არის სიძულვილი, რომ რა არის სიყვარული ეს გაიგო. უნდა იცოდე, კი არ უნდა გძულდეს, უნდა იცოდე, რომ ესეც ხდება და აირჩიო - მე ასე არ მინდა! დამარცხების ფასი გამარჯვების ტოლია

თუ გვინდა ბავშვებს გამარჯვება ვასწავლოთ, პირველ რიგში კულტურა ვასწავლოთ. ადამიანები შევაყვაროთ. მათთან ურთიერთობის ფუფუნება დავანახოთ და შევაყვაროთ. რა ძვირფასი, ადამიანი რომ გყავს და მასთან ურთიერთობა შეგიძლია! ამ ურთიერთობაში ორივე მხარე რაღაცას იძენს... ეს დიდი კულტურაა, თუ ეს ისწავლა ბავშვმა, მაშინ გამარჯვების ხარისხს ფასი არ დაედება!

იქ, სადაც ფიზიკური ძალა იმარჯვებს, მარცხდება ზნეობა

სპორტი, კრივი, ჭიდაობა,.. ბავშვისთვის კარგია. კუნთები იმისთვის გვაქვს, რომ სიმაგრე შეიძინოს, ძალა მოგვცეს და საჭირო დროს გამოვიყენოთ. მაგრამ თუ ამ კუნთებს ვიყენებთ იმისთვის, რომ ვინმეს რამე წავართვათ, ვინმე დავჩაგროთ, დავამარცხოთ,.. გარეგნულად ასეთი გამარჯვება, სულის მარცხს ნიშნავს

არ გაამართლოთ გაღიზიანება არაფრით. ამ ფსიქოლოგიურ განცდას გამართლება არ უწერია

სათუთობაში აღზრდა გამორიცხავს უხეშობას, იძულებას, დასჯას, დაჩაგვრას, გაღიზიანებას, ყვირილს... ხმას არ აუმაღლოთ! თქვენი სახლიდან წივილ-კივილი არ უნდა გავიდეს გარეთ

ჩვენ რომ ბავშვი გამარჯვებული გავზარდოთ, პირველ რიგში საკუთარი თავი უნდა აღვზარდოთ. კანონია ასეთი - აღზრდა საკუთარი თავის აღზრდით იწყება. შვილის აღზრდა გინდათ? - ჯერ საკუთარი თავი! ბავშვის აღზრდა საკუთარი თავის აღზრდით იწყება

მასწავლებლებო! არ გააკრიტიკოთ და პატივი ეცით ბავშვს არასოდეს დააბეზღოთ ბავშვი მშობელთან ბავშვი მშობლის თვალში აამაღლეთ დაეხმარეთ ბავშვს და გვერდით დაუდექით შეამკეთ ბავშვი!

სკოლა, სადაც ბავშვებს არ უნდათ სიარული, ბოლო აგურამდე უნდა დაიშალოს და ახალი სკოლა აიგოს ისეთი, სადაც ბავშვები სიხარულს იპოვიან

თუ ბავშვს არ უჩვენე სიკეთე, სიკეთეს ვერ მიიღებ მისგან! თუ სიყვარული არ უჩვენე, სიყვარულს მისგან ვერ მიიღებ! თუ კეთილშობილება და დიდსულოვნება არ დაანახე, ასეთს ბავშვს ვერ გახდი! მაგრამ თუ რამე უკუღმა დაანახე, იმ უკუღმართობას მიიღებს! არადა მასში ღმერთისგან ჩათესილია სიკეთის და სიყვარულის მოთხოვნილება,.. უნდა უჩვენო ბევრი სიკეთე და სიყვარული, რომ შემდეგ გამოგივლინოს ეს თვისებები

ბავშვის აღზრდის ჭეშმარიტება (ეხლა არ გაგიკვირდეთ როგორც ეს დამთავრდება) საკუთარი თავის აღზრდაშია

თუ მშობელი ჩივის შვილის საქციელზე, ხოლო თავის ქცევებს არ აანალიზებს, თუ რამდენად სწორად იქცევა თვითონ ბავშვთან, ასეთ შემთხვევაში მას ჩივილის უფლებაც კი არ აქვს. რასაც აძლევს ბავშვს, იმას იღებს შედეგად

ამ ხნის კაცი თუ მე ჩემ თავს ვზრდი, ჩემზე ახალგაზრდებმა რატომ არ უნდა გაზარდოთ თქვენი თავი, რათა მერე თქვენმა შვილებმა კარგი მაგალითი აიღონ თქვენთან? ზარდეთ თქვენი თავი. თავშეკავება ისწავლეთ, დათმობა და დახმარება ისწავლეთ, თქვენ შვილებთან მეგობრობა ისწავლეთ. ალერსი და სიყვარულის ნაირფერი გამოვლენა ისწავლეთ. ეს ყველაფერი არც კი მოსთხოვოთ ბავშვს, თუ ჯერ თქვენ არ ისწავლით. ის დამნაშავე არ არის

ბავშვის ზედმეტი კონტროლი ძალიან უშლის ხელს მასთან დამეგობრებას

თუ გულწრფელად დიდ ინტერესს გამოიჩენთ შვილის ინტერესების მიმართ, მერე ისინიც დაინტერესდებიან თქვენით და ასე შესაძლებელია შვილთან მეგობრობის ჩამოყალიბება