ციტატები, გამონათქვამები

ძაღლი, როგორც ზრუნვის ობიექტი

ადამიანებმა ძაღლებით ჩაანაცვლეს ზრუნვის ობიექტები და იქ გადაიტანეს ზრუნვის ინსტინქტი და უარს ამბობენ შვილის ყოლაზე.

ყველაზე რთულია, წერო აქ და ახლა, იმიტომ, რომ შენს გვერდით ვინც არის, მათზე ნაწერი არ უნდა გაგიყალბდეს, რეალური უნდა იყოს.

საბჭოთა კავშირში ღმერთი აკრძალული იყო. ვინც ეკლესიაში მიდიოდა, "კაგებე" დევნიდა. სიტყვა ღმერთის ხსენება გმირობად ითვლებოდა.

რამხელა უხილავი სამყაროა ჩვენ თვალწინ, რომელსაც ვერ ვხედავთ, თუ მიკროსკოპში არ ჩავიხედეთ. ტელესკოპი და მიკროსკოპი არის სამყაროს გაფართოების ორი მნიშვნელოვანი იარაღი.

ადამიანის ყოველი შეკითხვა თვისებრივად რელიგიური გამოდის იმ თვალსაზრისით, რომ ჩვენ საიდუმლოს ამოხსნას ვცდილობთ, და არ აქვს მნიშვნელობა, რა სიტყვებით ვაფორმებთ ამ კითხვებს, ან რა გზებს გავდივართ ამ საიდუმლოს ამოსახსნელად.

მოგზაურობა შეუფასებელი რამ არის თითოეული ადამიანისთვის, ცოდნის, შეგრძნებების გაღრმავებისთვის.

ფეხბურთი არის ამბავი, რომელიც შეიძლება რომ მოჰყვე.

ფსიქოლოგმა არ უნდა გათქვას პაციენტის შესახებ ისეთი რამ, რაც მის ღირსებას შელახავს, ან რაც მის ცხოვრებას დააზიანებს.

თუ პაციენტთან დაკავშირებული გარკვეული ამბის გათქმაა საჭირო, ეს არ ხდება პაციენტის ღალატით, არამედ - მასთან შეთანხმებით, მით უმეტეს, თუ ვინმეს სიცოცხლე არის საფრთხეში. მცირეწლოვან ბავშვსაც კი ვუთანხმებთ იმდენს, რამდენის შეთანხმებაც შეიძლება.

ფობია, როგორც სიმბოლიზებული შისი

ფობია ხშირად არის სიმბოლიზებული შისი, თითქოს რაღაცაში თავს მოიყრის და რაღაც დოზამდე შესაძლოა განმაკურნებელიც კი იყოს, იმიტომ, რომ გენერალიზებულ შფოთვას არიდებდეს ადამიანს და კონცენტრირდებოდეს ერთ წერტილში. თუმცა, თუ ეს ფობია ისე გამწვავდა, რომ (თუ კალიების ფობია გაქვს) კალიები გელანდება იქაც, სადაც არ არის, ასეთ დროს ყველა ვარიანტში ფსიქოთერაპიაა საჭირო და გაცნობიერება იმისა, თუ სინამდვილეში რისი შიშია ეს, რომელსაც შენ კალია ან პეპელა დაარქვი.

დასვენებაც დისციპლინაა, რომ ენერგია აღიდგინო

ცხოვრებაში ერთხელ ყველას გვტკიებია თავი

ცხოვრებაში ერთხელ ხომ ყველას გვტკიებია თავი, მაგრამ, არ გვაქვს შაკიკი; ყველას გვტკიებია კუჭი, მაგრამ, არ გვაქვს გასტრიტი; ცხოვრებაში ერთხელ ხომ რაღაცა გვიგრძვნია. ზუსტად ასე არის ფსიქიკური მოვლენებიც. ჩვენ შეიძლება ჰალუცინაციაც გამოვცადოთ მთელი ცხოვრების მანძილზე ერთხელ. ჩვენ შეიძლება დეპრესიასაც გავუგოთ გემო. შეიძლება დერეალიზაციაც გვესტუმროს. ჩვეულებრივი, ცხოვრებისეული რამ არის და არაფერი არ არის ამაში საპანიკო.

სამყაროს ადეკვატური არეკვლა

თუ ხანძარი გაჩნდა და შენ პოზიტივისკენ მიმართე გონება და არ შეიმჩნიე ეს ხანძარი, არ გამოგადგება. საუბარია, არა განრიდებით ქცევაზე, რომ რამე ვერ დაინახო, არ შეიმჩნიო, არამედ, საუბარია - სამყაროს ადეკვატურ არეკვლაზე, ანუ, რასაც ვხედავთ, მის მიმართ რომ ზომიერი რეაქცია გვქონდეს.

ფიქრების კონტროლი შეგიძლიათ?

ფიქრებს არ სჭირდებათ კონტროლი, ფიქრები უნდა მოვიდნენ. უბრალოდ, ამ ფიქრების წაკითხვისას მათი სწორად დალაგება უნდა ვცადოთ.

განცდები რომ გვაქვს, მაგიტომ ვართ ადამიანები. მთავარია, რომ განცდების გაფორმებაში, წარმოსახვაში, ინტერპრეტაციაში არ წავიდეთ არასწორი გზით, არამედ, დავრჩეთ სწორ კვალზე.

ზომიერად მგრძნობიარე უნდა იყო!

მგრძნობიარე უნდა იყო, მაგრამ ეს მგრძნობიარობა არ ნიშნავს იმას, რომ გადაგტეხოს ყოველმა ქარის დაბერვამ. თუმცა, არაუშავს იმას, ქარში რომ შენც ირხეოდე.

მთავარია ჩავეტიოთ ჯანსაღ დროში!

მთავარი ის კი არ არის, რომ ტრავმა არ დაგვემართოს და სტრესი არ განვიცადოთ, არამედ, მთავარია, ამ სტრესის დაშლისას და მონელებისას ჩავეტიოთ ჯანსაღ დროში. მაგალითად, ადამიანს თუ ფეხი მოსტყდა, ამას აქვს გონივრული ვადა, როდის უნდა შეხორცდეს ეს ჭრილობა. ამ გონივრულ ვადას უნდა შევხვდეთ მოთმინებით და ჩავეტიოთ ჯანსაღ დროში, როცა ეს სტრესი მოსანელებელი და დასაშლელია. არ უნდა გვქონდეს ჭარბი რეაქცია იმაზე, რასაც მცირე რეაქციაც ეყოფა და ჯანსაღ დროში ჩავეტიოთ, რომ მოვინელოთ ის ბრაზი, წყენა თუ სხვა დარტყმა ცხოვრებისგან.

სტრესს რამდენად მდგრადეგი ვხვდებით

ჩვენი იდეალი ის კი არ არის, რომ რობოტებად ვიქცეთ, რომელიც აღარც ტირის, აღარც იცინის, - სულაც არა! აქ საუბარია ბალანსზე და ჯანსაღ მომნელებელ სისტემაზე, იმ ტრაუმის, სტრესის მიმართ, რომელიც მოაქვს ცხოვრებას, ანუ, რამდენად ჩვენ მას მდგრადები დავხვდებით.

სტომატოლოგსაც უჩნდება კარიესი

ფსიქოლოგსაც შეიძლება დასჭირდეს ფსიქოლოგი. სტომატოლოგსაც კარიესი უჩნდება და სხვა სტომატოლოგთან მიდის. ნებისმიერ ექიმს, მისივე პროფილის ექიმის დახმარებაც შეიძლება დასჭირდეს.

თქვენ გაქვთ თქვენი გზა. და თუ არ გექნებათ თქვენი გზა, ფასიც არ ექნება სხვის კოპირებას!

შინაგან ხმას რომ მოუსმინო, უნდა იყო ჩუმად.

ყველა ადამიანი არის ხატი ღვთისა. შეიძლება მისი საქციელი არ მომწონს, მაგრამ, არ შეიძლება, რომ მე თავად ის ადამიანი არ მიყვარდეს. თუკი ქრისტიანი ვარ, აუცილებლად უნდა მიყვარდეს ისიც კი, ვისი საქციელიც არ მოგვწონს.

გაჭირვება, რასაც უფალი ჩვენზე უშვებს, არის მისი საკონტაქტო ენა, რომ არ დაგვავიწყდეს ღმერთი, რომ მივმართოთ ღმერთს ლოცვით, და რომ დავუბრუნდეთ იმ წიაღს, რისთვისაც ვართ შექმნილები.

რამდენადაც წმინდაა გული, ისეთივეა ხედვა. როდესაც ადამიანს გული აქვს დაბინძურებული, ხედვაც ასეთი აქვს. ძალიან რელიგიურები იყვნენ ქრისტეს ჯვარმცმელები, მაგრამ მათი გული ვერაფერს გრძნობდა. გაქვავებული ჰქონდათ გული.