ციტატები, ვიდეო ამონარიდები

გიტარით ნასწავლი ვეფხისტყაოსნის პროლოგი

ძალიან გაუმართლა ჩემი მეგობრების შვილს, რომელსაც მის გარშემო ადამიანები, ანუ ოჯახი, სკოლა, მასწავლებლები ეხმარებიან იმის აღმოჩენაში, თუ რა არის მისი უნიკალური გზა სწავლის, ანუ როგორ სწავლობს. გიტარაზე დაკვრას სწავლობდა თავისით, გიტარასთან ერთად იძინებდა და იღვიძებდა და ამ პერიოდში ვეფხისტყაოსნის პროლოგი ზეპირად ისწავლა სიმღერით, სხვანაირად ვერ სწავლობდა. დიდი დრო გავიდა და დღესაც გეტყვის ზეპირად. რატომ? იმიტომ, რომ მისი უნიკალური გზით აქვს ნასწავლი. აღმოაჩინა, რომ გიტარა ამაში დაეხმარებოდა. სხვებს, მის კლასელებს უკვე დაავიწყდათ.

რა არის პატრიოტიზმი

ყოველ შემთხვევაში, ქუჩაში ყვირილი "საქართველოს გაუმარჯოს", პატრიოტიზმი არ არის. პატრიოტიზმი არის, როდესაც შენ გინდა, რომ თითოეულმა ადამიანმა შენს გარშემო, კონკრეტულმა ადამიანმა - შენმა ნათესავმა, მეზობელმა, მისმა ნათესავმა, მეგობარმა იცხოვროს კარგად. როდესაც შენ გინდა, რომ საქართველოში წარმოებული, დავუშვათ ფეხსაცმელი, საკვები პროდუქტი უკეთესი იყოს ვიდრე იტალიაში ან იაპონიაში წარმოებული, როდესაც შენ გინდა, რომ ამერიკაში ვინმე რომ იტყვის ეს კაცი ქართველიაო, ადამიანს სასიამოვნო ასოციაციები გაუჩნდეს. მგონია პატრიოტიზმი შედგება ასეთი კონკრეტული რაღაცებისგან და კიდევ ერთხელ ვამბობ, ნამდვილად არ არის ქუჩაში ყვირილი.

ნიჭი თესლივით არის, თუ დროულად არ გააღვივე შრომით, ეს ნიჭი ჩახმება

სიტყვა "ჰუმანური" ნიშნავს ადამიანს, რომელიც თავის თავში უკვდავებას დაეძებს, ღმერთს დაეძებს, რომელიც თავისი თავის შემეცნებაშია