ციტატები, გამონათქვამები

ვინც ბედნიერებას ეძებს, მან ჯერ პატივი მიაგოს მიზეზს. თუ არ შექმენი მიზეზი, არ გექნება შედეგი

ქალი რისია, თუ მზრუნველი არ იქნება, თანაც მოწადინებული მზრუნველი

შემოქმედებითი ცხოვრება დინების წინააღმდეგ

არ ავმაღლდეთ?
ამ ამაღლებას უნდა ჭიდილი ცხოვრებასთან. ჭიდილი აზრით, საქმით, ძიებით, შემოქმედებითი ცხოვრებით. შემოქმედება ყველაფერშია, არავინ არ თქვას - "მხატვარი არა ვარო", - განა მარტო მხატვრები და კომპოზიტორები ქმნიან რაღაცას... დიასახლისი, რომელიც დიდი სიყვარულით გაამზადებს კერძს და ლამაზად მიართმევს ოჯახს, ესაც შემოქმედებაა

თუ უარყოფა არ მოხდა ძველისა, ახალი არ გაჩნდება. უნდა უარყო, რომ ახალი გაჩნდეს, და თუ ახალი არ გაჩნდება, ცხოვრებაც არ არსებობს. ცხოვრება არის მხოლოდ ახალი საფეხურები

როგორც "ყველამ", არავინ არ უნდა იცხოვროს. უნდა იცხოვრო ისე, როგორც შენი სინდისი, ნამუსი, გული გიკარნახებს

აი ნამდვილი ცხოვრება!

ცხოვრების წინააღმდეგ სვლა - აი ნამდვილი ცხოვრება - დინების წინააღმდეგ რომ მიდიხარ, უფრო სწორად, იმ ტრადიციებისა, იმ ქცევებისა, იმ ურთიერთობებისა, რაც არ მოგწონს

ბევრი, ცხოვრებას მიჰყვება, როგორც ნაფოტი, ძალიან ბევრი. იქნებ უმრავლესობაც კი ნაფოტივით ცხოვრობს. ან უბრალოდ - ცხვრებივით ცხოვრობენ, საითაც თითს გაუშვერენ, იქით გარბიან

თამაში ბავშვის განვითარებისთვის

თამაშში დიდი განვითარება ხდება ბავშვისა. რომ არ ითამაშოს ბავშვმა, კაცი ვერ შედგება. იტყვიან ხოლმე ფსიქოლოგები - თამაში, განსაკუთრებით 7 წლამდე, ბავშვის განვითარების ერთადერთი გზაა

ბიზნესსა ქმნი? - შექმენი თამაშით, და არა ნერვიულობით - ვაი დავიქცევი, ვაი გავკოტრდები...

თუ არ იქნებით როგორც ბავშვები, ვერ შეხვალთ ცათა სასუფეველშიო. - ეთამაშე ცხოვრებას - ბავშვს როგორც უყვარს, აი ასე გიყვარდეს ცხოვრება.

ცხოვრებას უნდა ეთამაშო

ცხოვრებას კი არ უნდა ებღაუჭებოდე, მას უნდა ეთამაშო.
უნდა გიყვარდეს ცხოვრება!

გინდათ, სამოთხის ოქროს გასაღები იპოვოთ?

სიყვარულია ბედნიერების გასაღები. გინდათ, სამოთხის ოქროს გასაღები იპოვოთ? - ეს გასაღები თქვენ უნდა გამოჭედოთ, იმიტომ, რომ თქვენს გულშია. გამოჭედავთ სიყვარულს? - მაშინ მოიპოვებთ ამ გასაღებს, ცხრაჯერ გადაატრიალებთ და სამოთხეში შეხვალთ

როდის მოწმდება ჩვენი სიყვარულის ძალა?

სიყვარული ყველას მიმართ!
ვის მიმართ? - მტრის მიმართ! - აქ მოწმდება ჩვენი სიყვარულის ძალა, როცა მიუტევებ იმას, ვის მიმართაც თითქოსდა შური უნდა იძიო. თუ შურისძიების გზით წავალთ, ერთმანეთს გავწყვეტავთ, იმიტომ, რომ ყველას ვიღაცასთან რაღაც ანგარიში გვაქვს გახსნილი

გაუფრთხილდით სიყვარულს, თუ ბედნიერებას ეძებთ

ბედნიერება არ არის თხასავით ხტუნაობა ბალახიან მდელოზე, ბედნიერება არის ჩვენი სულის საწყისი

მართალი კაცი ქვაზე მაგარიაო - ე.ი. ბედნიერია. ვინც ქვაზე მაგარია, ბედნიერია

ვინც თავის სულთან და სინდისთან მართალია...

ვინც თავის სულთან მართალია, ვინც თავის სინდისთან მართალია, მეტი გზა არც არის, ბედნიერია ასეთი ადამიანი. თუმცა წააწყდება ბევრ გაუგებრობას, - ამ გაუგებრობებსაც ბედნიერად მიიღებს, იმიტომ, რომ მართალია!

წერეთ ხშირად

წერეთ, წერეთ ხშირად. იმიტომ კი არა, რომ შვილებს დაუტოვოთ მერე, - ნახე რა დავწერეო - შეიძლება ბუხარში შეაგდო და დაწვა, მაგრამ ხომ გაიგე საკუთარ თავზე მეტი, საკუთარ სულში ხომ ჩაიხედე

უსიყვარულოდ ბედნიერება არ არსებობს. მითუმეტეს, მაღალი ბედნიერება, რომელიც მე მომავალი ცხოვრებისთვისაც მამზადებს და აქაც კარგად მაცხოვრებს, აი ეს მაღალი ბედნიერება მაღალი სიყვარულის გარეშე არ არსებობს.

მასვი, მაჭამე, მალხინე, დრო გამატარებინეო,..
რას ქვია!
ეს ცხოვრება უნდა გაიარო შემოქმედებაში, შრომაში, პატივისცემაში, გაგებაში, მეგობრობაში, ერთობაში... აი, ამ გზას გაივლი? - სადღეგრძელოებიც კარგი იქნება

სიყვარულს შეუძლია ბედნიერება დაგვიმკვიდროს

სიყვარულს შეუძლია ჰორიზონტს იქით ბედნიერება დღეს დაგვიმკვიდროს.
მიხვედი ცათა სასუფეველში, მიიტანე სიყვარული, როგორც ნათელი, და ამ სიყვარულმა თვითონ დაგაყენა იმ ადგილას, რაც შენ აქ დაიმსახურე

თუ გინდათ, რომ ოჯახი შეინარჩუნოთ და განავითაროთ...

ოჯახი თუ გინდათ შეინარჩუნოთ და განავითაროთ, სიყვარული უნდა ზარდოთ. სიყვარულს უნდა მოვლა, მორწყვა, ალერსით, მოთმინებით, ყველა კეთილი განცდით და ამგვარად სიყვარული გაიზრდება

გაღიზიანებული ქალი ოჯახში

ცუდი რაღაცაა გაღიზიანება. ქალი თუ გაღიზიანებულია, იფანტება ოჯახი, ბავშვები იმალებიან, ქმარი ყურებზე ხელებს იფარებს,.. აბა გაღიზიანების მომენტში სარკეში ჩაიხედეთ, რაც მეტად გაღიზიანდები, მეტად დაკარგავ სილამაზეს...

რა გვჭირდება? - სიმშვიდე!
სიმშვიდეში აზრი მუშაობს.
სიმშვიდეში სიბრძნე მოგივა.
სიმშვიდეში მეტს დააკვირდები. ადამიანს მეტს გაუგებ, თვალებში ჩახედავ. ბევრი რამ მოხდება სიმშვიდეში.
გაღიზიანებაში ყველაფერი ეს - გარბის. რომელი ადამიანია ბრძენი, როდესაც რისხვაშია გადასული? - უგუნური ხდება. განრისხებული ადამიანი უგუნური ხდება. ამიტომ ხდება უბედური შემთხვევები, ჩხუბები, მკვლელობები,.. აბა დამშვიდდნენ, გაიცინებენ, - ეს რა გვემართებაო. რა გვინდა ერთმანეთისგან? უნდა გვიყვარდეს ერთმანეთი!