ციტატები, გამონათქვამები

ბავშვი რომ იბადება, მამაც იბადება, დედაც, ბებიაც, დეიდაც იბადება... ე.ი. ბავშვის დაბადება სხვათა დაბადებასაც ნიშნავს, სოციალურად

ძალიან საჭიროა სკოლაში ბავშვმა ისწავლოს დედობა და მამობა

აღზრდა გადაზრდილი თვითაღზრდაში

კარგი აღზრდა ოჯახში ორი რამით ხდება:
1. მშობლების კვალი უნდა იყოს ნათელი
2. აღზრდა უნდა გადაიზარდოს თვითაღზრდაში

თუ მამა საკუთარ სახელს არ გაუფრთხილდება, შვილის ცხოვრებაში ეს იქნება ფეხწამოსაკრავი ქვა. მამის სახელზე შვილმა არ უნდა იბორძიკოს

მიწისძვრები ოჯახში

არ შეიძლება მამა დაამციროს დედამ. არ შეიძლება სახლში წიოკობა. "სად იყავი", "რად დაიგვიანე", "ვისთან დაეთრეოდი"... არის ხოლმე ხანდახან ასეთი შეხლა-შემოხლა. ოჯახში ასეთი მიწისძვრები სიკეთის მომტანი არ არის

დედისა და მამის ქცევა უკვე აღზრდაა ბავშვისა.
დედა როგორ ხვდება შინ დაბრუნებულ ქმარს, ან როგორ გააცილებს, ან როგორ ზრუნავს, ან შვილს რას ეუბნება მამაზე...

ცოლის მიმართ სიყვარული

ჩვენ ვიცით ფიზიოლოგიური სიყვარული, და როცა ფიზიოლოგია ამოგვეწურება, ეს სიყვარულიც გვისუსტდება. მაგრამ, თუ გვეყვარება ადამიანი, როგორც ღვთის შვილი, სიყვარული შენარჩუნდება. ცოლი მარტო ცოლი კი არ არის, უფლის შვილია (როგორც ჩვენ ყველანი), და თუ მე ცოლი აღარ მიყვარს, მაშასადამე - უფალიც აღარ მიყვარს. ვისაც ადამიანი სძულს, ღმერთი არ უყვარს, ეს ნამდვილად ასეა. თუ ადამიანს პატივს არ სცემ, ე.ი. იმ წამს შენ ღმერთსაც არ სცემ პატივს.

კარგი მამა რომ იყო...

კარგი მამა რომ იყო, ცოლი უნდა გიყვარდეს. თუ ცოლი არ გიყვარს, მამა ვერ გახდები. არ შეიძლება ცოლი არ გიყვარდეს და შვილი გაგიჟებით გიყვარდეს, იმიტომ, რომ მან გააჩინა

ვისაც ადამიანი სძულს, ღმერთი არ უყვარს. თუ ადამიანს პატივს არ სცემ, ე.ი. იმ წამს პატივს არ სცემ ღმერთსაც

რატომღაც, როცა აღზრდაზე ვსაუბრობთ, სულ დედაზე გადაგვაქვს მთელი სიმძიმე. ეს ასეც არის, მაგრამ მამას დიდი როლი აქვს ბავშვის აღზრდაში და საერთოდ, ოჯახის ცხოვრებაში

ადამიანი უკვდავია, არა კვდება. რომც გინდოდეს, რომ თავი მოიკლა, ვერ მოიკლავ, იმიტომ, რომ ადამიანს აქვს სული და ის არის უკვდავი

რაც უფრო დიდი გეგმა გექნება, მით უფრო დიდხანს დაგტოვებენ აქ

ბავშვი ჩვენი გამოცდაა

შვილები მარტო იმიტომ კი არ მოდიან, რომ გავზარდოთ, ისინი ჩვენი გამოცდები არიან. შეგიძლია ჩააბარო 100 ბალიანი შეფასებით კაცობის გამოცდა? - აი შვილი მოგივიდა, რომელმაც ცუდი რაღაც ჩაიდინა. ეგ შენი გამოცდაა. აბა ჩააბარე გამოცდა. ან ლაწა უნდა გაადინო, ან ის სიბრძნე უნდა მონახო და ამ ბავშვს ჩააგონო, რომელიც მას იმ მომენტისთვის სჭირდება.
რასაც ჩვენ ბავშვების აღზრდით გავდივართ, ეს ძალიან ძნელი გამოცდებია და ამიტომ გვინდა სრულვყოთ საკუთარი თავი, რომ ბავშვს ჩავაბაროთ გამოცდები წარმატებით

ბავშვები ჩვენზე ბრძენები არიან. ხანდახან ისეთ რამეს იტყვის ბავშვი, ჭკუიდან გადაგიყვანს. ვისაც გყავთ 3-4-5 წლის ბავშვები, ჩაიწერეთ, რასაც ამბობენ, ეს თქვენ გაკვეთილებად გამოგადგებათ ყველას

ვისაც არჩევანის შესაძლებლობა არა აქვს, არ შეუძლია გაარჩიოს კარგი და ცუდი, ის პიროვნება არ არის

დაწყებითების მასწავლებელი აურჩიეთ ბავშვს

მასწავლებლები აურჩიეთ ბავშვს, განსაკუთრებით დაწყებით კლასებში. არ მიუგდოთ ბავშვი ნებისმიერს, ვინც შეგხვდებათ სკოლაში, იმიტომ, რომ ზოგიერთი მასწავლებელი გადაყირავებული ტვინით არის. ზოგიერთი - თქვენ გაჯობებთ ზრუნვასა და სიყვარულში ბავშვის მიმართ. აარჩიეთ ხოლმე მასწავლებლები, რომლებიც განთქმულნი არიან ასეთი ქცევით და მათ მიუყვანეთ ბავშვი

სიყვარული, ისევე, როგორც რწმენა, საქმეთა გარეშე მკვდარია. ათასჯერ რომ თქვა, მწამს ღმერთიო, მოციქული გეტყვის - კი გწამს, მაგრამ საქმეები მიჩვენე, თორემ ვერ გავიგებ, მართლა გწამს, თუ არაო.
მთავარი საქმე ის არის, რომ ადამიანებში ვხედავდეთ ღმერთს და ვეპყრობოდეთ ადამიანებს ისე, როგორც ღმერთი მოექცეოდა მათ

გიყვარდეთ ერთმანეთი, როგორც მე შეგიყვარეთ თქვენო - ქრისტეს აქვს ნათქვამი.
მშობლებსაც შეგვიძლია შვილებს ვუთხრათ - გიყვარდეთ შვილებო ერთმანეთი, როგორც მე, დედას/მამას უყვარხართ თქვენ, ასე გიყვარდეთ ერთმანეთი. და ამავე დროს ვუჩვენებ, როგორ მიყვარს ისინი

სადაც კი შეგვიძლია მივბაძოთ უფალს.
როგორია ის? კეთილია - ვიყო კეთილი.
როგორია ის? ყველა უყვარს - მიყვარდეს ყველა.
როგორია ის? ყველას ყველაფერს უთმობს - დავუთმო მეც ყველას ყველაფერი.
პატარა რაღაც მცნებები მოგვცა და შევუსრულოთ ეს მცნებები. ამ ქვეყნად კარგი სახელი დაგვერქმევა და იმ ქვეყნადაც, ვისაც სწამს, და მე მწამს, სხვა ცხოვრება დაგვეწყება

დადგება დრო, როცა ოჯახსაც და სკოლასაც დაეკისრება აღზარდოს ღმერთკაცი, განა კეთილი ადამიანი მხოლოდ, არამედ - ღმერთკაცი. ოჯახს და სკოლას აქვს ეს ძალები

ვიყოთ ისეთი სრულყოფილნი, როგორი სრულყოფილიც არის ჩვენი ზეციერი მამაო - ეს ქრისტემ რომ დაგვარიგა. ამით რა გვითხრა ქრისტემ? - ის, რომ მე თურმე შემძლებია ღმერთკაცი გავხდე. თუკი ვიზრუნებ, მე შემიძლია ამ დონეს მივაღწიო

მიყვარს გზასაცდენილი სიყვარულით გამოვასწორო და გზაზე დავაყენო

სული სხეულის ბატონია. სხეული სულის ინსტრუმენტია, იარაღია. აქ, სემინარზე რომ მოსულიყავით - ფეხები გინდოდათ, ტანისამოსი რომ ჩაგეცვათ - ხელები გინდოდათ,.. ამას სხეული აკეთებს, ვისი ბრძანებით? - სულის!

როდის მაქვს სატირლად საქმე?

მოვუფრთხილდეთ ამ ჩვენს იშვიათ განძს [სულს]. ამიტომ ვართ აქ ამქვეყნად. რომ წავალთ, სულს წავიღებთ. სხეული ძველდება, რაღაც დაემართება და გამოვა მწყობრიდან. ასე ხდება ყველას მიმართ, მეც იგივე უნდა დამემართოს, და სატირელი რა მაქვს? ვიტირო მაშინ, თუ მე მარტო ამ სხეულს მივაგე ყოველი სიკეთე, ვასვი, ვაჭამე, გავართე და გავალაღე და სული დავივიწყე