ციტატები, გამონათქვამები

არ შეგშურდეს! შური თუ არ ჩამოიცილე ბედნიერი ვერ იქნები.
წყენა თუ არ ჩამოიცილე, ბედნიერი ვერ იქნები.
თუ მიტევება არ იცი, ბედნიერი ვერ იქნები.
თუ მტრობა გაქვს ვინმეს მიმართ, რა ბედს უნდა ეწიო? ვერ იქნები ბედნიერი

გაჭირვებაში გაზრდილი ბავშვი ხანდახან გენიოსი ხდება, ხოლო ფუფუნებაში და სიმდიდრეში გაზრდილი ბავშვი იჩაგრება მერე ცხოვრებაში

ოჯახი რომ იშლება, ეს ნანგრევებია, რომლის ქვეშაც ბავშვი უნდა მოჰყვეს.
როცა სახლი ფიზიკურად ინგრევა, ეს ტკივილი უფრო ნაკლებია, ვიდრე ის ტკივილი, რასაც ბავშვი მშობლების კონფლიქტის დროს განიცდის

გაეცი, რომ მიიღო

აუცილებლად, სიკეთეს მოსდევს შენთვის კიდევ უფრო დიდი სიკეთე.
გაეცი, რომ მიიღო.
"მიიღე, რომ გასცე" კი არა, ჯერ გაეცი.
ღებულობს ის, ვინც გასცემს

რაღაცა დაკარგე? - ჭკუით ამაღლდი, მომავლისთვის გაფრთხილდი, აღარ დაკარგავ. მაგრამ ვინც ის იპოვა, სიკეთე შეუთვალე მას, ალბათ სჭირდებოდა და იპოვა.
იტყვიან ხოლმე - როცა რამეს დაკარგავ, თქვი, ალბათ დრო დადგა, ახალი შევიძინო

ყველაფერში, რასაც ცუდ მოვლენად აფასებ, არის რაღაც კარგიც.
ნათქვამია - არავინაა შენი მტერი, არავინაა შენი მეგობარი, ყველა შენი მასწავლებელია.
ყველა ადამიანი და ამავე დროს ყველა მოვლენა შენი მასწავლებელია

ბედისწერაშიც კი შეიძლება ბედნიერება იპოვო.
როგორ მიიღებ ამას, რა სულით მიიღებ, იმის მიხედვით ან ბედნიერი იქნები, ან - უბედური

შეიძლება ბედი იპოვო იქ, სადაც უბედობაა.
ბედისწერა მოგადგა? - იმაში იპოვი ბედს

ქართველ კაცს აქვს ნათქვამი - სახლი რომ გეწვოდეს, ხელი მოითბეო.
იწვის უკვე და ამით მაინც ისარგებლე

მე შემიძლია ვიყო მუდმივად ბედნიერი

როცა მე გემსახურებით თქვენ, ნაცნობს, უცნობს, ამაში ვხედავ ჩემი კმაყოფილების რაღაც წყაროს.
ბედნიერება კმაყოფილებაა.
ამრიგად, მე შემიძლია ვიყო მუდმივად ბედნიერი

ვის გადავუხადოთ მშობლების ზრუნვა ჩვენზე?

ვის გადავუხადოთ ჩვენი მშობლების ზრუნვა ჩვენზე? დედას როგორ გადავუხდით?
ნათქვამია, - ხელის გულზე ერბოკვერცხი რომ შეუწვა, დედის ამაგს ვერ გადაიხდიო.
მაგრამ, შემიძლია გადავუხადო, - შვილს გავზრდი მე. მან ხომ მე გამზარდა, ახლა მე შვილს გავზრდი, სხვას დავეხმარები შვილის აღზრდაში, მის შვილს ხელში დავიჭერ, შვებას მივცემ, სიტყვას შევაშველებ,..

სიკეთე თუ გააკეთე, იქვე დაივიწყე, ვის რა გაუკეთე. თუ დაიხსომებ, მაშინ უნდა გაუხსენო, არა? და თუ გაუხსენებ, ღმერთი ჩამოგაწერს მაგ სიკეთეს და პირიქით, ცოდვაში ჩაგითვლის.
მაგრამ, თუ ვინმემ გაგიკეთა სიკეთე, აი ეგ არ უნდა დაივიწყო. უნდა გადაუხადო. მას თუ არა, სხვას მაინც

მე მინდა, რომ თქვენ შეგიწყოთ ხელი. მე შეიძლება მაკლდეს რაღაც, მაგრამ გამოვიქცევი, რომ თქვენ შეგიწყოთ ხელი.
ვიღაცას მოვეფერები, ვიღაცას გავუღიმებ, ვიღაცას გულში ვუსურვებ კარგს.
ცხოვრებაში ვარ აი ასეთი კაცი.
თქვენი აზრით, უბედური ვარ თუ ბედნიერი?

აქ იწყება ჩვენი ბედნიერება

კარგიც მოხდება, ცუდიც მოხდება, უნდა ყველაფერი მივიღოთ.
თუ მივიღებთ, აი აქ იწყება ჩვენი ბედნიერება.
რაც ჩვენს ირგვლივ ხდება, არ დავარქვათ არაფერს კარგი და ცუდი. რაც მოხდა, ამას ვეღარაფერს ვეღარ ვუშველით.
კარგი მოხდა? გავიხაროთ.
ცუდი მოხდა? დასკვნა გავაკეთოთ, - რატომ მოხდა ეს? და აი ამაში დავინახავთ ამ თითქოსდა ცუდი რაღაცის სიკეთეს

აი როგორ მიიღებ ცხოვრებას, იმის მიხედვით განისაზღვრება როგორი ადამიანი ხარ, ბედნიერი თუ რაღაცა დაკარგე

"რა სემინარი გიშველის, ეს სიტყვები თუ წამოგცდება"

დაუყვირებს ზოგი დედა შვილს - "კუბოში მანახა შენი თავიო" - ეს სიტყვები რომ წამოგცდება, რა სემინარი გიშველის ამის მერე?

სიყვარული სიყვარულით აღიზრდება. სიყვარული არ აღიზრდება სიძულვილით. ქართველ ხალხს უთქვამს - "შვილი მტრად გაზარდე, მოყვრად გამოგადგებაო" - არ გამოგადგება მოყვრად, მტრად გაზრდილი შვილი. მტრად გაზრდილი მტერი გაგიხდება, მოყვრად გაზრდილი - მოყვრად გაგიხდება

სად ვეძებოთ ბედნიერება?

ერთმა ფილოსოფოსმა თქვა: "ბედი ყველგან არის, და ის არსადაც არ არის".
სადაც არ უნდა ეძებო ბედი, ვერ იპოვი, გარეთ ბედი არ არსებობს. ჩემშია ბედი, მე ვარ შიგნით ბედნიერი.
მე როგორ მიგიღებთ თქვენ, ამის მიხედვით, ან ბედნიერი ვიქნები, ან უბედური.
მნიშვნელობა არა აქვს გარეთ რა ხდება, მე შიგნით უნდა ვიგრძნო ბედნიერების განცდა

ბედნიერება, ბედი და უბედურება ერთმანეთზე გადაჯაჭვულია და ძალიან მნიჭშვნელოვანია ამაში გავერკვეთ, იმიტომ, რომ როცა გავერკვევით, გვეცოდინება, საით ვიაროთ, და თუ ვერ გავერკვევით, ბედნიერებას დავუწყებთ ძიებას იქ, სადაც ის არ არის

რას დავარქვათ ბედნიერება?

ბედნიერება არის შინაგანი მდგომარეობა.
ბედნიერება არ ნიშნავს, რომ მე სულ ცეკვა-თამაშში და სიმღერებში ვარ.
შეიძლება რაღაცაში ჩაფიქრებული ვიყო, ქვეყნის ბედი მაწუხებდეს, მაგრამ ბედნიერი ვიყო მაინც. ბედნიერი იმით, რომ რაღაცას ვემსახურები

პირველი შვილი ქმარია

ისე, რომ იცოდეთ, ჩემო ძვირფასო ქალბატონებო, ვინმე, რომ მეტყვის 5 შვილი მყავსო, ერთიც უნდა დაუმატოთ. ყველაზე დიდი ქმარია, პირველი შვილი ქმარია.

არ გეწყინოთ ამას რომ ვამბობ, მოსავლელები ვართ ჩვენი ქალებისგან, მაგრამ ხან გვივლიან და ხან არ გვივლიან.

რაც მეტს ღიზიანდები, მით მეტად გეცვლება ფიზიოლოგიურად სხეული, მით მეტი მომწამვლელი ნივთიერება ჩნდება სხეულში, რომელიც შეიძლება კიბოს, ან სხვა რომელიმე დაავადების წინაპირობა გახდეს.
გაბრაზებული ადამიანები ძალიან ხშირად ავად ხდებიან

გინდა კეთილშობილი გაზარდო შვილი? - კეთილშობილი იყავი შენ. შენც დამშვენდები და შვილიც დამშვენდება.
დიდსულოვანი გინდა? - შენ თავად იყავი დიდსულოვანი.
დიდსულოვანი რომ გაზარდო შვილი, შენ თავად მოძებნე დიდსულოვნება საკუთარ თავში

თუ ჩვენ გვინდა, რომ ჩვენი ბავშვები კეთილშობილები გამოვიდნენ, დაიხსომეთ აღზრდის ყველაზე მთავარი წესი - ბავშვების აღზრდა საკუთარი თავის აღზრდით იწყება