ციტატები, მოკლე გამონათქვამები

ჩვენ აქედან რაღაც დიდი გვაქვს წასაღები თან. ამისთვის, ჩვენ უნდა მოვიცილოთ ის საზრუნავები, რაც ჩვენ ცხოვრებას ახურდავებს. ხშირად ჩვენ ცხოვრებას ვახურდავებთ უაზრო სანახაობებზე, გართობებზე, დროსტარებაზე...

გინდათ ბედნიერები იყოთ?
სხვა არაფერში არ არის ბედნიერება, გარდა სიყვარულისა.
ქონებაში ბედნიერებას ვერ იპოვით. ვერც მოგზაურობაში ვერ იპოვით ბედნიერებას.
ბედნიერება ორი პიროვნების ურთიერთობაში იბადება

როცა ჩვენ რაღაც გვაინტერესებს, უფრო ადვილად ვიღებთ და ვიგებთ, ვიდრე მაშინ, როცა არ გვაინტერესებს. წიგნი, რომელიც არ გაინტერესებს, აბა როგორ წაიკითხავ? მაგრამ, თუ დაგაინტერესდა, უკვე აღარ გინდა ძალდატანება

უსიყვარულოდ ბედნიერება არ არსებობს. მითუმეტეს, მაღალი ბედნიერება, რომელიც მე მომავალი ცხოვრებისთვისაც მამზადებს და აქაც კარგად მაცხოვრებს, აი ეს მაღალი ბედნიერება მაღალი სიყვარულის გარეშე არ არსებობს.

ზოგიერთი რაღაცა, რაც არ გამოგდით, შეიძლება დამარცხებად მიიჩნიოთ. თუმცა ამ დამარცხებაში გამარჯვება იბადება. ჩვენ ყოველთვის შეგვიძლია გამარჯვებული ვიყოთ, იმის მიხედვით, თუ როგორ შევხედავთ ჩვენს ცხოვრებას

მარტო ერთი კაცი ვერ იქნები ბედნიერი ცხოვრებაში. მე ვერ ვიქნები ბედნიერი ახლობლების ბედნიერების გარეშე. ვერ ვიქნები ბედნიერი შვილების ბედნიერების გარეშე, ბებიების და პაპების, მშობლების, ამ სოფლის გარეშე...

ურთიერთობაში არ შეიძლება სიძულვილი შეურიო. არ შეიძლება ვინმე არ გიყვარდეს. თუ ვინმესთან ურთიერთობ, როგორიც არ უნდა იყოს ის, ბავშვი იქნება თუ დიდი, უნდა წინასწარ გიყვარდეს, თორემ ურთიერთობა იქნება დამშლელი

ხასიათით, პიროვნული მახასიათებლებით, გამკლავების მექანიზმებით, კონტაქტებით, ჯდომის მანერით, ჭამის მანერით, სიარულით,.. შეიძლება ადამიანი ჰგავდეს ისეთ შორეულ ან ახლო ნათესავს, რომელიც არც არასდროს უნახავს

მშობლის მაგალითი ეკლესიურ ცხოვრებაში

ის ბავშები, რომლებიც ხედავენ, რომ მშობელი არ ეზიარება, სანამ პატარები არიან, მოდიან და იღებენ ზიარებას, მაგრამ მოგვიანებით უკვე "ხვდებიან", რომ შეუძლიათ აღარ ეზიარონ. მშობლის მაგალითი ძალიან მნიშვნელოვანია

როცა ერთმანეთს კეთილი თვალებით უყურებთ, კეთილდებით. აბა ხშირად გამიღიმე... მე სხვანაირი გავხდები შენთვის. სულ სხვანაირი. და შეიძლება სხვასაც უკვე სხვა თვალით შევხედო და შენი გამოცდილება სხვაზეც გადავიტანო

კაცი გარბის სახლიდან, ახალი შეყვარებული ჰყავს, - ხომ მაქვს პირადი ბედნიერების უფლებაო.
- გაქვს, მაგრამ აქ რომ დაანგრიე სხვისი ბედნიერება? ამას რა ვუყოთ? ამ ნანგრევებში რომ ბავშვები მოყვნენ, რა ვუყოთ ამას ჩვენ?

სულელ ადამიანს დიდხანს არ დაუდგე

კი მიყვარს, მაგრამ, არ დავუდგები დიდხანს. სულელ ადამიანს რომ დიდხანს დაუდგე, შეიძლება შენც გასულელდე. ამიტომ, კეთილი უსურვე მას და თუ არ შეგიძლია, რომ მოაჭკვიანო, წადი შენი გზით. მას თავისი მასწავლებელი მიუვა

უნდა გაუგო ახალგაზრდობას

ჩვენმა თაობამ უნდა ეცადოს, რომ როგორმე ახალგაზრდა თაობას გაუგოს, თუ ვერ გაიგებს, ან არ მოინდომებს გაგებას, აუცილებლად წააგებს, იმიტომ, რომ ის ახალგაზრდაა, ენერგიით და იდეებით სავსე.
უნდა გაუგო ახალგაზრდობას!

სიყვარული სილგრძელია,
ქველმოქმედია,
ყოველივეს იტანს,
ყველაფერი სწამს,
ყველაფრის იმედი აქვს,
არ შურს,
არ ყოყოჩობს,
არ ამპარტავნობს,
არ სჩადის უწესობას,
არ ეძებს თავისას,
არ რისხდება,
არ განიზრახავს ბოროტს

გაიღიმეთ 😊

სიყვარული საქმეთა გარეშე ფუჭია. ამიტომ, საქმით დავამტკიცოთ ჩვენი სიყვარული. უხვად გავცეთ ჩვენი სულიერი განძი - ღიმილი.
გაიღიმეთ 😊 გიხდებათ ღიმილი
ღმერთმა ჩვენი მშვენიერებისთვის გვაჩუქა ღიმილი ადამიანებს

არ შეგშურდეს! შური თუ არ ჩამოიცილე ბედნიერი ვერ იქნები.
წყენა თუ არ ჩამოიცილე, ბედნიერი ვერ იქნები.
თუ მიტევება არ იცი, ბედნიერი ვერ იქნები.
თუ მტრობა გაქვს ვინმეს მიმართ, რა ბედს უნდა ეწიო? ვერ იქნები ბედნიერი

მეგობრობის გარეშე არ გამოგვივა თანამედროვე ინდიგო ბავშვების აღზრდა, ტყუილია.
არ ეცადოს მშობელი, რომ ზემოდან დაადგეს ბავშვს და თითით უჩვენოს - სად წავიდეს, სად არ წავიდეს, ვისთან იმეგობროს, ვისთან არ იმეგობროს

მადლიერება ერთ-ერთი ძალიან ღირსეული თვისებაა ადამიანისა. პიროვნება არ არსებობს მადლიერების თვისების გარეშე.
მადლიერნი ვიყოთ ყველასი და ყველაფრის, მიუხედავად იმისა, თუ როგორ გვექცევა ყველა და ყველაფერი ჩვენ

სადაც საქმე არ არის, ყველაფერი კვდება

ყველაფერი, რაც საქმით არ განმტკიცდება, მკვდარია:
მკვდარია ჩვენი რწმენაც, საქმეთა გარეშე;
მკვდარია ჩვენი სიყვარულიც, საქმეთა გარეშე;
ჩვენი ზრუნვაც საქმეთა გარეშე მკვდარია;
სადაც საქმე არ არის, ყველაფერი კვდება

ვიყოთ ისეთი სრულყოფილნი, როგორი სრულყოფილიც არის ჩვენი ზეციერი მამაო - ეს ქრისტემ რომ დაგვარიგა. ამით რა გვითხრა ქრისტემ? - ის, რომ მე თურმე შემძლებია ღმერთკაცი გავხდე. თუკი ვიზრუნებ, მე შემიძლია ამ დონეს მივაღწიო

ცხოვრებაზე და გამოცდილებაზე ძვირფასი არაფერი გვაქვს ჩვენ.
თუ ჩავუფიქრდებით სად რა შეგვემთხვა, როგორ გავართვით თავი, როდის რა როგორ მოხდა,.. თუ ასეთ მომენტებს გავაანალიზებთ ხოლმე, უთუოდ რაღაცა სიბრძნე დაგვრჩება

მიიღეთ ცხოვრებაში ყველაფერი ისე, როგორც ხდება. ხდება ეს უკვე. გაღიზიანება ვერ გიშველის, ძალებს დაკარგავ.
თუ შეგიძლია უშველე, დაეხმარე, გადაარჩინე, ჩააქრე,.. გაღიზიანება ვერაფერს ვერ შეცვლის კარგისკენ, ცუდისკენ - კი

ღმერთისა და ნათლის რწმენას, მათკენ მისწრაფებას სასწაულების მოხდენა შეუძლია.
ჩვენი რწმენა ჩვენ ცხოვრებაში სასწაულებს შექმნის.
რწმენა გვეხმარება ძალთა მოკრებაში, მიზნების მიღწევაში, საკუთარ თავზე გამარჯვებაში

შენი ცხოვრება უნდა შექმნა შენს საყვარელ ადამიანებთან ერთად, ისე, რომ თავისებური სილამაზე და ესთეტიკა ჰქონდეს. თუ მხოლოდ მატერიალურზე ფიქრობ და ადამიანური ურთიერთობები არ გაინტერესებს, მაშინ ეს მხოლოდ არსებობაა