ციტატები, მოკლე გამონათქვამები

რაც თავში გვაქვს, იმას ვავლენთ გარეთ!

აზრით შენდება ქვეყანა. ჯერ უნდა დააპროექტო, რომ მერე ააშენო. ჯერ უნდა იზრუნო ადამიანზე, რომ მერე რაღაც გამოგივიდეს [აღზრდაში]. აზრი ქმნის ცხოვრებას, მაგრამ, თუ აზრი არეულია, ისევე ვცხოვრობთ გარე სამყაროში. რაც თავში გვაქვს, იმას ვავლენთ გარეთ. რაც თავში არ გვაქვს, იმას არც ვაკეთებთ

ჩვენ აქ სადა ვართ ახლა?

რაც არ უნდა სასახლეები ავიშენოთ, სასტუმროში ვართ მაინც. რაც არ უნდა ჩემი იძახო, მაინც სხვისი იქნება ის მერე.
ღირს ქონებით ტრაბახი? - არა!
უნდა გვქონდეთ საკუთრება, მაგრამ, განცდა საკუთრებისა მოვიცილოთ.
ჩემია, მაგრამ, შენიც არის!
ჩემია, მაგრამ შენიც იყოს!
ჩემია, მაგრამ შენთვის მინდა!

"კიდევ კარგი ის მოხდა"

გაიხსენეთ რაღაც მოვლენა თქვენი ცხოვრებიდან, რასაც თქვენ "ცუდი" დაარქვით. გაიხსენეთ, რა მოხდა, და აბა გამოყევით იმ გზას, სად მიხვალთ. მიხვალთ დასკვნამდე, რომ კიდევ კარგი ის მოხდა, თორემ ეს ხომ არ მოხდებოდა. ის, მაშინ არ მომწონდა, ცუდი მეგონა, მაგრამ, თურმე ის ყოფილა მიზეზი, ამ სიკეთისა.

ცხოვრება ისეთია, როგორებიც ჩვენ ვართ. არავინ არ თქვას - ცუდი ცხოვრება არისო. შენ ხარ ცუდი და ცუდად გეჩვენება, გახდი კარგი და კარგს დაინახავ. თვალები ხედავენ იმას, რაც შიგნიდან მინდა დავინახო. ჩემი განწყობები ხედავენ და არა - თვალები. ე.ი შინაგანი მდგომარეობა ხედავს, ესაა მხედველობა

წიგნი ჩვეულებრივ ადამიანებზეა

მასწავლებლის მთავარი ამოცანა არის ის, რომ მან დაანახოს მეორე ადამიანს, რომ რასაც წიგნში კითხულობს, არის მისი ნაწილი. თვითონ ადამიანია და ამ წიგნში მონაწილეც ადამიანია. არ უნდა გავასაკრალუროთ ლიტერატურა, არამედ, უნდა დავანახოთ მეორე ადამიანს, რომ წიგნი ჩვეულებრივ ადამიანებზეა.

გვეშველება რამე?

ხშირად ვსვამთ ხოლმე კითხვას - გვეშველება რამე?
ეკლესიაში უნდა შევიკრიბოთ და ეკლესიაში უნდა ვისწავლოთ ნამდვილი ურთიერთობა, ნამდვილი მეგობრობა, ნამდვილი ერთგულება, ნამდვილი უღალატობა და აქედან გამოსულები ავაშენებთ იმ საზოგადოებას, რომელი საზოგადოებაც მერე ააშენებს ქვეყანას.

ყველას მიმართ კეთილგანწყობილი იყავი!

ადამიანის მიმართ კეთილგანწყობილი იყავი. ყველა ადამიანი ღვთის ხატია. რაც არ უნდა დაივიწყოს ადამიანმა ღვთის ხატობა, მასში მაინც არის პოტენციალი ღვთის ხატად ქცევისა. ყველა ადამიანში უნდა დაინახო ეს პოტენციალი, რომელიც თავის თავში მზეს და ღვთის ხატობის სილამაზის კრისტალს ინახავს.

როგორ აზიანებს ტყუილი ადამიანს?

ტყუილმა იცის დიდ მანტიაში გახვევა და კასკადირება. ტყუილი არ არის ერთჯერადი. გარკვეული როლები არსებობს, რომლებსაც აქვთ ქცევის რეპერტუარი. ამ როლში შესულ ადამიანს ბევრად უფრო უჭირს, ვიდრე სცენაზე მდგარს, იმიტომ, რომ სცენაზე მდგარი გავა კულისებში და გაიფერთხავს იმ როლს, რაც ითამაშა.

რისთვის გვაქვს კუნთები?

სპორტი, კრივი, ჭიდაობა,.. ბავშვისთვის კარგია. კუნთები იმისთვის გვაქვს, რომ სიმაგრე შეიძინოს, ძალა მოგვცეს და საჭირო დროს გამოვიყენოთ.
მაგრამ თუ ამ კუნთებს ვიყენებთ იმისთვის, რომ ვინმეს რამე წავართვათ, ვინმე დავჩაგროთ, დავამარცხოთ,.. გარეგნულად ასეთი გამარჯვება, სულის მარცხს ნიშნავს

რას გინდა რომ მიაღწიო ცხოვრებაში?

თუ საბოლოო წერტილი არ იცი შენი პროფესიული განვითარების, როგორ მიხვდები, ამ ვიდეოს უყურო, თუ სხვა ვიდეოს; ეს არხი გამოიწერო, თუ სხვა არხი; ჩვენ ტრენინგზე მოხვიდე, თუ სხვა ტრენინგზე; მოკლედ, ძალიან მნიშვნელოვანი პირველი ნაბიჯი არის, რომ კარგად დაფიქრდე, რას გინდა რომ მიაღწიო ცხოვრებაში

ეს შემისრულე და მოვდივარ, სადაც გაგიხარდება!

სიწყნარეს და სამართლიანობის აღდგენას ვისურვებდი ამ ქვეყანაში. საოცრად დიდი სურვილი მაქვს, რომ ჩვენმა შვილებმა და შვილიშვილებმა ნანატრ საქართველოში იცხოვრონ. მამა ზეციერს სულ ვევედრები, - ასეთი საქართველო მაჩვენე და მერე სადაც გაგიხარდება მოვდივარ, არავითარი პრეტენზია არა მაქვს.

წიგნი რომ არ იკითხოს ბავშვმა ...

წიგნების კითხვა დაივიწყეს ბავშვებმა, იმიტომ, რომ სხვა, უფრო საინტერესო წყაროებია შემეცნებისა, ინტერნეტის ჩათვლით. მაგრამ, წიგნი რომ არ იკითხოს ბავშვმა, დაიკარგება ცხოვრებაში. ელექტრონულ წიგნს წაიკითხავს, თუ - ფიზიკურს, ეს სხვა საკითხია, მაგრამ, ბავშვმა აუცილებლად უნდა იკითხოს წიგნი.

მიზანი თუ არ არის, არც გამარჯვებაა. რაც უფრო დიდია მიზანი, მით უფრო დიდია გამარჯვება.
დიდ მიზნებს რომ ვეტანები, დიდი ძალები მჭირდება და უფრო ძლიერი ვხდები. პატარა მიზნებს რომ ვეტანები, იმ დონისა ვხდები, რა ძალებსაც ვხარჯავ.
აღმოსავლური ანდაზა - ჩვენ იმ ძალებს ვიძენთ, რასაც გადავახტებით

თუ ჩვენ სიყვარულის გამტარნი ვიქნებით, შესანიშნავი მასწავლებელი გამოვა თითოეული ჩვენგანისგან. თუ არადა, მასწავლებლობაც დაკარგულია - დავუყვირებთ, ვეჩხუბებით, ვაიძულებთ, მშობლებს დავიბარებთ, რომ ვუთხრათ, თუ რა ცუდი შვილები ჰყავთ და ა.შ - აი ეს გამოვა მოსწავლის მიმართ სიყვარულის გარეშე

აღზრდაზე დიდი თვითაღზრდაა, როცა საკუთარ თავს შენვე დაუწყებ გამოჩორკნას. თუ ჩვენ საკუთარი თავის აღზრდით დავკავდებით, რამდენიმე წელიწადში შესაძლებელია ანგელოზების დონემდეც კი ავმაღლდეთ. შეგვიძლია გავხდეთ კეთილი ბუნების ადამიანები, რომლებისგანაც სიკეთე და დადებითი ემანაცია მოდის

ყველამ უნდა გაიხსენოს (ვისაც მამა ჰყავს წასული) ყველა სიტყვა, მოქმედება მამისა. რომ ეყვირა კიდეც მამას, არა მგონია, რომ მხოლოდ შვილის დაჩაგვრისთვის ეყვირა. [შვილის აღზრდისთვის] გზა ვერ გამოუნახიათ სხვა. არადა კარგი უნდოდათ და უკეთესი რომ ვერაფერი მოიფიქრეს, ეს უძლურების გამოხატულებაა

სახლი რომ გეწვოდეს, ხელი მოითბეო

ქართველ კაცს აქვს ნათქვამი - „სახლი რომ გეწვოდეს, ხელი მოითბეო“ - იწვის უკვე და ამით მაინც ისარგებლე. ამ დროს ვინც თავში ქვას ირტყამს, ვაიმე იწვის სახლიო, ამით სახლს ვერ უშველის. სახლი მაინც იწვის. ეს გონივრული ანდაზაა. შეიძლება ბედი იპოვო იქ, სადაც უბედობაა. ბედისწერა მოგადგა? - იქ იპოვი ბედს!

გაღიზიანება ჯანმრთელობას აზიანებს

გაღიზიანება სხეულს აზიანებს. გაღიზიანების დროს ჩნდება მომწამვლელი ნივთიერება, რომელიც ილექება კაპილარების კედლებზე და აღარ ქრება. აქედან, ზოგს კიბო, ზოგს კი სხვადასხვა დაავადება უვითარდება. რისთვისაც ხშირად ქიმიური მედიკამენტებით ვმკურნალობთ, თანაც ისე, რომ გაღიზიანებასაც ვინახავთ

რა არის თავისუფლება? - თავისუფლად ყოფნა, თუ თავის დაუფლება? ხშირად ვიხსენებთ ხოლმე ავთანდილის ცნობილ ლოცვას - "მომეც დათმენა სურვილთა, უფალო, უფლებათაო" - როდესაც ჩვენ ტაბუ შემოგვაქვს ჩვენს ცხოვრებაში, მეორე, უფრო დიდი და მნიშვნელოვანი რამის სასარგებლოდ. ადამიანი ხომ დათმენის არსებაც არის.

ბოროტება ვერ ზრდის სიკეთეს

სიკეთე სიკეთით აღიზრდება;
სიყვარული სიყვარულით აღიზრდება;
თავმდაბლობა - თავმდაბლობით;
კულტურა - კულტურით;
სილამაზე - სილამაზით;
ბოროტება ვერ ზრდის სიკეთეს. ეს კანონი არ არსებობს. სიკეთეს კი შეუძლია ბოროტება დაადნოს, იქიდან ის ამოიღოს, რაც სიკეთეს გამოადგება და დანარჩენი ნაგავს გაატანოს

თუ შენ წრეში ყველაზე წარმატებული ხარ...

თუ შენ წრეში ყველაზე საქმიანი და წარმატებული ხარ, დიდი შანსია, სიზარმაცემ დაგარწმუნოს, რომ ისედაც ძალიან კარგი ხარ, შენი სოფლიდან ყველაზე მეტს შენ მიაღწიე და დაანებე ეხლა თავი. ასეთი მაგალითები ბევრი გვინახავს, ამიტომ, ძალიან მნიშვნელოვანია ის, ვინც შენში აღვიძებს მეტის მიღწევის სურვილს.

თუ გინდა გამარჯვება, დამარცხების ფასიც უნდა იცოდე.
თუ გინდა კეთილი იყო, ბოროტი უნდა იცოდე.
თუ გინდა გიყვარდეს, უნდა იცოდე რა არის სიძულვილი, რომ რა არის სიყვარული ეს გაიგო.
უნდა იცოდე, კი არ უნდა გძულდეს, უნდა იცოდე, რომ ესეც ხდება და აირჩიო - მე ასე არ მინდა!
დამარცხების ფასი გამარჯვების ტოლია

შეიძინეთ დღიური / დანომრეთ დღეები

შეიძინეთ დღიური, დანომრეთ, გამოთვალეთ, თქვენი დაბადების პირველი დღიდან მერამდენე დღე გაქვთ ახლა. იარეთ პირველი იანვრიდან იმ დანომრილი დღეებით, იმიტომ, რომ თქვენი დღეები დათვლილია. მე მინდა, თქვენ ათი ათასობით დღე გისურვოთ, მაგრამ ჩემი სურვილი ვერაფერს გახდება. ღმერთმა გამოთვალა ეს დღეები.

ძალიან დიდ მნიშვნელობას ვანიჭებ ოჯახში საერთო ტრაპეზს. ჩვენ ყოველთვის ვცდილობთ, რომ დღის განმავლობაში ერთხელ მაინც ერთად დავსხდეთ, ყოველგვარი ტელეფონების და ტექნიკის გარეშე. ოჯახის სიმტკიცისათვის ამას ერთ-ერთი გადამწყვეტი მნიშვნელობა აქვს, რომ იქ ადამიანებმა ერთმანეთს აზრი გაუზიარონ