ციტატები, გამონათქვამები

რა სრულვყო ჩემ თავში? - პირველ რიგში აზრი დავიმორჩილო და მეორე რიგში - სიყვარული გავაფართოვო და ესენი ერთმანეთს შევურწყა.
როცა ვაზროვნებ სიყვარულით, ეს სხვა აზროვნებაა. როცა ვაზროვნებ სიყვარულის გარეშე, ეს სხვა აზროვნებაა.
სიყვარულით აზროვნებაში უფალს უახლოვდები, უსიყვარულოდ აზროვნებაში - მცირდები

აზრი ყველაფრის საწყისი ენერგიაა, მაგრამ სიყვარული ყველაფრის შემოქმედი ენერგიაა. ეს ორი ერთად აშენებს ქვეყანას

როცა გეცოდინებათ, თუ რა გაქვთ გასაკეთებელი, გზებსაც მონახავთ, როგორ გააკეთოთ.
როცა ამოცანას დაისახავთ, იქ გზებიც გამოინახება

აზრით შენდება ქვეყანა. ჯერ უნდა დააპროექტო, რომ მერე ააშენო. ჯერ უნდა იზრუნო ადამიანზე, რომ მერე რაღაც გამოგივიდეს [აღზრდაში]. აზრი ქმნის ცხოვრებას, მაგრამ, თუ აზრი არეულია, ისევე ვცხოვრობთ გარე სამყაროში. რაც თავში გვაქვს, იმას ვავლენთ გარეთ. რაც თავში არ გვაქვს, იმას არც ვაკეთებთ

ჩვენ გარდამქმნელი აზროვნება გვაქვს

ჩვენ მოაზროვნე არსებანი ვართ. ცხოველთა სამყაროშიც არის აზრი, მაგრამ გარდამქმნელი აზრი არ არის მათში. ჩვენ გარდამქმნელი აზროვნება გვაქვს. ძაღლი თავის ლეკვებს წიგნს ვერ დაუწერს, ვერ დაარიგებს, თავის გამოცდილებას ვერ გადასცემს. ასწავლის იმას, რაც მათში ბუნებითაა ჩადებული და იქ გაჩერდება. ხოლო ჩვენ ვიზრდებით წინა თაობების ცოდნაზე და გამოცდილებაზე. ასევე, მომავალ თაობასაც დავუტოვებთ ჩვენ ცოდნასა და გამოცდილებას, ნაკლებად რომ იწვალონ და მეტად დაწინაურდნენ

შვილის სული ვერ აღიზრდება მუქარით, გაღიზიანებით

დედავ! ისმინე ქართვლის ვედრება:
ისე აღზარდე შენ შვილის სული,
რომ წინ წარუძღვეს ჭეშმარიტება,
უკან ჰრჩეს კვალი განათლებული.
-----
ვერ აღზრდით შვილის სულს გაღიზიანებით, ჯიჯღინით, ჩხუბით, დამუქრებით...

ჭეშმარიტი ჰუმანური განათლება სულის აღზრდაში მდგომარეობს

მრისხანე ადამიანი ვერ შეძლებს მოიპოვოს ჰარმონია და თანაცხოვრების წინსვლა

გაღიზიანების დროს ყრუები და ბრმები ვხდებით. ადეკვატურად ვერ აღვიქვამთ გარემოს

გაღიზიანება ვერაფერს ვერ შეცვლის კარგისკენ, ცუდისკენ - კი

მიიღეთ ცხოვრებაში ყველაფერი ისე, როგორც ხდება. ხდება ეს უკვე. გაღიზიანება ვერ გიშველის, ძალებს დაკარგავ.
თუ შეგიძლია უშველე, დაეხმარე, გადაარჩინე, ჩააქრე,.. გაღიზიანება ვერაფერს ვერ შეცვლის კარგისკენ, ცუდისკენ - კი

გაუძელით გაღიზიანებას, იყავით მშვიდად ერთი თვე, და მერე აღარ მოგინდებათ უკან დაბრუნება

გაღიზიანება ჯანმრთელობას აზიანებს

გაღიზიანება სხეულს აზიანებს. გაღიზიანების დროს ჩნდება მომწამვლელი ნივთიერება, რომელიც ილექება კაპილარების კედლებზე და აღარ ქრება. აქედან, ზოგს კიბო, ზოგს კი სხვადასხვა დაავადება უვითარდება. რისთვისაც ხშირად ქიმიური მედიკამენტებით ვმკურნალობთ, თანაც ისე, რომ გაღიზიანებასაც ვინახავთ

ჭეშმარიტი აღზრდა საკუთარი თავის აღზრდაშია

ჩვენ აქედან რაღაც დიდი გვაქვს წასაღები თან. ამისთვის, ჩვენ უნდა მოვიცილოთ ის საზრუნავები, რაც ჩვენ ცხოვრებას ახურდავებს. ხშირად ჩვენ ცხოვრებას ვახურდავებთ უაზრო სანახაობებზე, გართობებზე, დროსტარებაზე...

ფსიქიკური ენერგიის ფლანგვა

ვინც სიგარეტსაა მიჩვეული, ან სმას, დროსტარებას,.. ასეთ ადამიანს თავში ასეთი აზრები უტრიალებს: დრო სად გავატარო, სიგარეტი სად ვიყიდო, შენ ხომ არ გაქვს სიგარეტი? მომაწევინე რაა, ცეცხლი გაქვს? მოუკიდე... რად მინდა მე ასეთი ცნობიერება და ეს აზრები, მაშინ, როცა უფრო მეტი სასიკეთო, სააზროვნო საქმე მაქვს? და ამაზე რომ დრო დავხარჯე? ამას ჰქვია ფსიქიკური ენერგიის ფლანგვა

როგორც თქვენ დაეჩვიეთ სიგარეტის წევას, ისე დაეჩვევა თქვენი შვილიც. იცით, რატომ არ უნდა ეწეოდეთ? ერთ ღერ სიგარეტს თქვენი ცხოვრებიდან 12 წუთი და 15 წამი მიაქვს თან.

როგორია დიდსულოვანი ადამიანი?

დიდსულოვანი ადამიანი არის დინჯი, ბრძენი, გამგები, დამთმობი,... დიდსულოვანმა იცის - დამდაბლდი, რათა ამაღლდეო - და არ მოგაჩვენებს თავს შენზე მეტად. ასევე, დიდსულოვანი ადამიანი არ არსებობს რწმენის გარეშე

კეთილშობილება კეთილშობილებით აღიზრდება

შვილთან ერთად ზრდა

გუშინ ერთი მშობელი მეუბნებოდა - ახლა გავიგე აღზრდა რა ყოფილაო. მე ჩემი თავი შვილთან ერთად უნდა ვზარდოო - ეს მართალია.
შვილთან ერთად გავიზარდოთ. როცა შვილთან ერთად იზრდები, ის წინ წავა. მაგრამ თუ გგონია, რომ შენ უკვე გაზრდილი ხარ - აი აქ ვდგავარ და ჩემ შვილს ჩემზე წინ არ გავუშვებო - შვილი მართლა ვერ წავა წინ. მოგემსგავსება შენ, უკეთეს შემთხვევაში

მე უნდა ვეცადო სრულყოფას. რა თქმა უნდა, ბოლომდე სრულყოფილი ვერ გავხდები, მაგრამ გავუსწრებ ჩემ თავს, შვილმა რომ ჩემგან უკეთესი რამ დაინახოს

გადადებული საქმე არ ნიშნავს, რომ დასრულდება. გააჩნია საქმეს, აღზრდაში გადადებული საქმე არ სრულდება, რჩება ნაკლოვანი

ხვალინდელი დღეო - ქრისტე ამბობს - თვითონ მოიტანს ხვალინდელ საქმეებს, დღევანდელი გააკეთეო

აღზრდაში არ შეიძლება რომელიმე დღე გამოტოვო. ხვალ აღვზრდიო - არ არსებობს. ან დღეს, ან არასოდეს