ციტატები, გამონათქვამები

რისთვის გვაქვს კუნთები?

სპორტი, კრივი, ჭიდაობა,.. ბავშვისთვის კარგია. კუნთები იმისთვის გვაქვს, რომ სიმაგრე შეიძინოს, ძალა მოგვცეს და საჭირო დროს გამოვიყენოთ.
მაგრამ თუ ამ კუნთებს ვიყენებთ იმისთვის, რომ ვინმეს რამე წავართვათ, ვინმე დავჩაგროთ, დავამარცხოთ,.. გარეგნულად ასეთი გამარჯვება, სულის მარცხს ნიშნავს

იქ, სადაც ფიზიკური ძალა იმარჯვებს, მარცხდება ზნეობა

ურთიერთობის ფუფუნება

თუ გვინდა ბავშვებს გამარჯვება ვასწავლოთ, პირველ რიგში კულტურა ვასწავლოთ.
ადამიანები შევაყვაროთ. მათთან ურთიერთობის ფუფუნება დავანახოთ და შევაყვაროთ.
რა ძვირფასი, ადამიანი რომ გყავს და მასთან ურთიერთობა შეგიძლია!
ამ ურთიერთობაში ორივე მხარე რაღაცას იძენს... ეს დიდი კულტურაა, თუ ეს ისწავლა ბავშვმა, მაშინ გამარჯვების ხარისხს ფასი არ დაედება!

თუ გინდა გამარჯვება, დამარცხების ფასიც უნდა იცოდე.
თუ გინდა კეთილი იყო, ბოროტი უნდა იცოდე.
თუ გინდა გიყვარდეს, უნდა იცოდე რა არის სიძულვილი, რომ რა არის სიყვარული ეს გაიგო.
უნდა იცოდე, კი არ უნდა გძულდეს, უნდა იცოდე, რომ ესეც ხდება და აირჩიო - მე ასე არ მინდა!
დამარცხების ფასი გამარჯვების ტოლია

ჰუმანური პედაგოგიკის მთავარი საფუძველი

ჰუმანურ პედაგოგიკას მთავარი საფუძველი სულიერება აქვს, რომელშიც ღმერთის რწმენაც და სულის უკვდავებაც არის ჩადებული. ასევე ისიც, რომ ეს ცხოვრება, რომელიც მონაკვეთი არის ჩემი მარადიული ცხოვრებისა, როგორ უნდა გავლიო აქ და რით უნდა წავიდე იქ. ხელცარიელი თუ ხელდამშვენებული

დაეხმარეთ სიდედრს

დაეხმარეთ მეზობელს,
დაეხმარეთ მეუღლეს,
დაეხმარეთ სიდედრს, სიმამრს,
ყველას, ვისაც კი იცნობთ და შეიძლება სჭირდებოდეს თქვენი დახმარება. ვისაც სჭირდება და ხედავთ, რომ მას თქვენი დახმარებით გაუადვილდება ან გამოუვა რაღაცა, უნდა შეეშველო, და მისმა გამარჯვებამ უნდა გაახაროს შენ

ერთმანეთს შევეშველოთ

სული მძიმე სატარებელია, ერთმანეთს შევეშველოთ სულის ტარებაშიო - რამხელა იდეაა აქ ჩადებული! მართლაც, ძნელია სულის სრულყოფა. შემეშველეთ თქვენ, მე კიდე თქვენ შეგეშველებით, იმიტომ, რომ თქვენ ჩემი ძალები გინდათ და მე თქვენი ძალები მჭირდება. ეს სხვადასხვანაირი ძალებია და ერთმანეთს რომ შევეშველებით, ცხოვრება ხალისიანი ხდება და ორივე გამარჯვებულები გამოვალთ.

გამარჯვებულია ის, ვინც სხვასაც ეხმარება გამარჯვებაში

გამარჯვებული ის არის, ვინც თავის გამარჯვებას არ ეძებს სხვის დამარცხებაში

აღზრდის საუკეთესო მეთოდი

ყველაზე კარგი აღზრდა მაშინაა, როცა ბავშვი მაგალითს ხედავს

გამარჯვებულია ის, ვინც თავის ნიჭს შრომის სახით სალესი მოუნახა, ვისაც უყვარს შემოქმედება

კაცი, რომელსაც შრომა არ უყვარს, ნაკლები შეხვდება. არადა, მისი წილი ყველაფერი, სიმდიდრე, ქონება, წინსვლა, თანამდებობა,.. უკვე იყო მისთვის გამზადებული.

ნიჭს სალესი უნდა. ეს არის - შრომა და შემოქმედება

93 წლის ასაკში ინგლისურის სწავლა დავიწყე

იმის აუცილებლობის წინაშე ვარ, რომ მცირედი ინგლისური ვიცოდე. სკოლამ არ მასწავლა. ავდექი და ამ ასაკში ჩემით დავიწყე სწავლა. აბა მე ვიყო 6 წლის, როგორ ბულბულივით დავეუფლებოდი ამ ენას. არაფერი გაჭირვება არ მექნებოდა. ამ ასაკში უკვე ძნელია.

ნიჭი თესლივით არის, თუ დროულად არ გააღვივე შრომით, ეს ნიჭი ჩახმება

შრომა ჩვენი ნიჭის სალესია. სადაც ეს სალესი არა გვაქვს, ათასი ნიჭიც რომ გვქონდეს, არაფერი გამოვა. ნიჭი ჩახმება

აი ეს არის ნამდვილი მიზანი - საკუთარ ძალთა სრულყოფა

როცა მიზნად ისახავ რაღაცას, თუ იმ მიზანს ათიანში ვერ მოარტყამ, ცხრიანში მაინც მიხვალ, რვიანში მიხვალ და ესეც გამარჯვება იქნება

მიზნის მიღწევაა გამარჯვება, თუ მიზანი არაა, გამარჯვებაც რა თქმა უნდა, არ იქნება

მარტონი მიზნებს ძნელად ვაღწევთ ან ვერც კი ვაღწევთ

მიზნისკენ სვლის პროცესი უკვე არის გამარჯვებისკენ სვლა

მიზნის მიღწევა, დროის, ფიზიკური და სულიერი ძალების მსხვერპლად გაღებას მოითხოვს

რომ მიიღო, უნდა გასცე ჯერ!
სიყვარული, პატივისცემა, ერთგულება, ქონება,.. გაეცით და მიიღებთ

როგორი ცოდვაა ადამიანი, რომელიც უკვალოდ გაქრება.
იყო ჩიტი მგალობელიო, იჭიკჭიკა, იჭიკჭიკა, წავიდა და არაფერი არ დაგვრჩა მისგან. უკვალოდ გაქრა.
კვალი!
კვალის დატოვებას კი მიზანი უნდა - კეთილშობილობით სავსე მიზანი.
მარტო მე, მე, მე კი არა, ჩემმა მიზანმა რაღაც სარგებელი უნდა მოგიტანოთ, თქვენ უნდა გარგოთ.
მეც იმდენი დამრჩება, რამდენსაც თქვენ კარგს გაგიკეთებთ